Эслатиш керакки, 2018 йил 25 июнда бўлиб ўтган президентлик ва парламент сайловларида иккита коалиция иштирок этганди. Биринчиси, “Жумҳур Иттифоқи” коалицияси бўлиб, унга фанатик исломчиларнинг Адолат ва Тараққиёт Партияси (АТП) ва бир маҳаллар ҳақиқий отатуркчиларники бўлган Миллиётчилар Халқ Партияси (МХП) кирганди.

Иккинчи коалиция “Миллат Иттифоқи” бўлиб, унга буюк Отатурк тарафидан яратилган Жумҳурият Халқ Партияси (ЖХП) ва МХПдан ажралиб чиққан миллатчиларнинг Яхши Партияси кирганди.

31 март куни бўладиган маҳаллий сайловларда, яъни вилоят, шаҳар ва туман ҳокимлари сайланадиган сайловларда яна ўша 2 коалиция - “Жумҳур Иттифоқи” ва “Миллат Иттифоқи” – ҳамда яна бир нечта майдароқ партияларнинг номзодлари иштирок этадилар.

Табиий, номзодлар кўрсатиб бўлинган, ҳозир асосан юқорида айтилган 2 та коалиция ўртасида сайловолди кураши эмас, сайловолди уруши кетмоқда. Ҳозирча ўтказилган турли сўровномалар натижасига кўра, Туркиянинг энг катта 3 та шаҳрида (Истанбул, Анқара ва Измир) “Миллат Иттифоқи”нинг ЖХПлик номзодлари олдинда кетишмоқда.

Аммо, Туркия бўйлаб “Жумҳур Иттифоқи” коалициясининг сайловолди кампаниясини мамлакат президенти Ражаб Эрдўған шахсан ўзи олиб бораётган туфайли, бу коалиция устидан осонликча ғалаба қозониб бўлмайди. Масалан, бугун Истанбулнинг машҳур Ениқапи майдонидаги сайловолди митингида 1,6 миллион одам қатнашгани иддао қилинди. Бу рақамга ишонадиган битта ҳам одам топилмаслиги аниқ. Аммо, бу митингда ҳам бош ролни Ражаб Эрдўған ўйнади.

Хуллас, Туркиядаги сайловлар 1 ҳафтадан кейин, яъни 31 март куни бўлади. Энди сайловолди кампаниясини яқиндан кузатиб борамиз.

Расмда – Ражаб Эрдўған ва турмуш ўртоғи Эмина хоним Истанбулдаги митинг саҳнасида.