28 January 2017
22:39 - Тошкентда “Бирлик” Партияси Марказий Кенгашининг мажлиси ўтди
Бугун Тошкентда “Бирлик” Халқ Ҳаракати Партияси Марказий Кенгашининг кенгайтирилган мажлиси бўлиб ўтди. 2003 йилда партиянинг Қўқонда ўтказилган қурултойида сайланган 38 кишилик Марказий Кенгаш аъзоларининг баъзилари оламдан ўтди, баъзилари партиядан айрилди, баъзилари турли сабаблар билан бугунги йиғилишга келолмадилар. Бугунги йиғилишда Марказий Кенгаш аъзоларининг катта бир қисми билан бир қаторда партиянинг вилоятлардаги фаоллари ҳам қатнашдилар.

33 кишининг шахсан иштирокида бўлган бугунги мажлисга ҳозир АҚШда мажбуран яшаётган партия раиси Абдураҳим Пўлат ва касаллиги туфайли Тошкентга келолмаган партия раиси ўринбосари, айни замонда, партиянинг Самарқанд вилоят ташкилоти раҳбари Холиқназар Ғани телефон орқали қатнашдилар.

Алоҳида таъкидлаш керакки, бу йиғилишда меҳмон сифатида “Эрк” партиясининг раиси Самад Мурод иштирок этди ва умумий мақсадалари бир бўлган демократик мухолифатчилар ҳар доим бирга бўлишлари кераклиги ҳақидаги аввалдан айтиб келаёган фикрини амалий иш билан исботлади, бугунги йиғилишда фаол иштирок этди.

Очиғини айтиш керакки, бундай йиғилиш ўтказиш учун сал кам бир йилдан бери ҳаракат қилиб келаётган Абдураҳим Пўлат ҳам, бу йиғилишни ташкил қилишда асосий ролни ўйнаган Васила Иноят ҳам, Ўзбекистондаги ҳозирги вазиятдан келиб чиқиб, бугунги йиғилишга 15-20 бирликчининг етиб келиши ҳақида ўйлашган ва шунга яраша кичик бир хонада йиғилиш ўтказишга тайёрланишган эди. Аммо, 30 дан кўп кишининг бу йиғилишга келиши туфайли баъзи қатнашчилар оёқда туришга мажбур бўлдилар. Аммо, бундан ҳеч ким норози бўлгани йўқ. Ҳамма йиғилиш қатнашчилари узоқ йиллардан бери биринчи марта тўпланиш имкониятига эга бўлганлдаридан хурсанд эдилар.

Йиғилишда биринчи сўз Вашингтондан телефон орқали боғланган партия раиси Абдурҳаим Пўлатга берилди. У бугун йиғилишга келган сафдошларининг олдида тиз чўкишга тайёр эканлигини, йиғлаб юбориш кайфиятида бўлгани сабабли гапириши қийин эканлигини таъкидлади ва сўнгра қисқа нутқ сўзлади. Аслида, бу нутқ ҳам эмас, бугунги мажлиснинг кун тартиби ва олинадиган қарорлар ҳақида фикр билдириш бўлди.

У охирги кунларда Васила Иноят ва Дайнов Ташанов ҳамда бир қатор вилоят ташкилотлари раислари билан маслаҳатлашганини айтиб, бугунги йиғилишнинг кун тартибига 3 та масалани киритишни таклиф қилди.

Биринчи. Ўзбекистондаги ҳозирги вазият ва янги президент сайланишидан кейин бўлиши мумкин бўлган ўзгаришларни ҳисобга олган ҳолда, янги ҳокимиятга баҳо бериш, унга бўлган муносабатимизни ва яқин келажак учун ўз йўлимизнинг йўналишларини белгилаб олиш. Ҳали янги ҳокимиятнинг ўзи келажак стратегиясини белгилаб олгани йўқ, демак, “Бирлик” бироз кутиши, ҳамма йўналишларда ижобий ўзгаришлар бўлишига умид қилиши керак. Яхши ўзгаришлар бўлса, уларни қўллаб қувватлашга ва янги ҳокимият билан ҳатто ҳамкорлик қилишга тайёр эканлигимизни ўз қароримизда билдиришимиз лозим.

Иккинчи. “Бирлик” Партиясини Адлия вазирлигида рўйхатдан ўтказиш масаласи. Ҳали ҳеч қаерда очиқча айтилмаган факт шундан иборатки, бир ҳафата олдин Васила Иноят Адлия вазирлигига хат ёзиб ва партияни рўйхатдан ўтказиш учун 2003 йилда берилган ариза ва кейин вазирликка берилган бошқа ҳужжатлар бўйича Адлия вазирлиги ҳалигача ўз қарорини бермаганлигини урғулаган эди. Вазирликнинг қарори партияни рўйхатга олиш ёки аризани рад этиш ҳақида бўлиши керак. Демак, бу масалада 13 йилдан бери натижа йўқлиги - вазирликнинг айбидир. Ҳозир бу масала қайтадан кун тартибига олиб чиқилиши ва бугунги мажлисда юқорида тилга олинган Васила Иноятнинг хати асосида Адлия вазирлигига партия номидан янги хат жўнатилиши керак. Ана ундан кейин воқеалар қандай давом этишидан келиб чиқиб, биз қайси йўналишда иш олиб бориш ҳақида қарорлар чиқараверамиз.

Учинчи. Ислом динининг бутун Ислом дунёсида ва Ўзбекистондаги аҳволи, Ислом дунёси жаҳоннинг энг қашшоқ ва қолоқ қисмига айланиб қолиши каби фактларга асосланиб, Ислом динида фундаментал ислоҳотлар ўтказиш ва Ислом дини дунёвийлик/секуляризм принципини қабул қилишига эришиш учун керакли ишларни қилиш. Бу осон иш эмас. Ишонаманки, ҳамма сафдошларимиз ҳам бу масаланинг моҳиятини яхши билишмайди. Бугун бу масала биринчи марта партиямизнинг кун тартибига олиб чиқилмоқда. Уни муҳокама қилиш ва келажак стратегиялармизни белгилаб олиш лозим. Бу масалада кўз юмиб бўлмайдиган нарсалар ҳам бор. Буларнинг энг асосийси – Ғарб давлатларида, жумладан, АҚШда мусулмонларга муносабат кескин ёмонлашмоқда. Францияда мачитларни бекитишмоқда, бир қатор Ғарб мамлакатларида мусулмон аёлларига юзини бекитиб юриш тақиқланди. Шуларнинг ҳаммасини ҳисобга олиб, фанатикларча эмас, бор ҳақиқатларни ҳисобга олиб иш олиб боришга маҳукммиз.

Мажлис қатнашчилар Абдураҳи Пўлатнинг таклифларини муҳокама қилиб, шу 3 масалани кун тартибига киритдилар.

Мажлисни партия раиси ўринбосари Дайнов Ташанов олиб борди ва кун тартибига киритилган 3 масала бўйича жиддий фикр алмашиш бошланди. Очиғини айтиш керак,Абдураҳим Пўлатнинг ўзи аввалдан башорат қилганидек, 3-чи масала, яъни Ислом дини билан боғлиқ масалада ўта эҳтиётлик қиладиганлар борлиги маълум бўлди, аммо “нима қилиш керак?” саволига жавоб қидириш йўлида биринчи муҳим қадам қилингани ўта муҳимдир.

“Бирлик” Партияси Бош котиби Васила Иноятга кўра, партия фаоллари Адлия вазирлигининг жамоат ташкилотларини рўйхатга олиш бошқармаси билан партияни расмийлаштириш масаласида ҳуқуқий кураш йўлида эдилар, ишлар шу йўлда давом эттирилади. Минг афсуски, вазирлик партия топширган ҳужжатлар ва 25 минг нафар партия тарафдорининг рўйхатини ўрганиш бўйича жўяли жавоб беролгани йўқ. Демак, бирликчилар вазирликнинг Ўзбекистон қонунлари доирасидаги жавобини олиш учун курашни давом эттиришлари керак ва давом эттирамиз.

Партиянинг Фарғона вилояти кенгаши раиси Адҳам Муҳиддинов ҳар бир фаол бугунги дунё ва мамлакатимиздаги сиёсий вазият борасида ўз фикрларини билдириши, вазият кўпчилик томонидан таҳлил этилиши зарур деб ҳисоблашини билдирди.

Бугунги йиғилишда айрим бирликчилар янги ҳокимият мамлакат халқи билан мулоқот қилиш дастурларидан хурсанд эканликларини мамнуният билан билдиришган бўлсалар-да, бошқалар жиддий сиёсий ўзгаришлар сезилмаётганидан хавотирда эканликлари сезилиб турарди.

Андижонлик бирличилар мамлакатдаги кейинги сиёсий ўзгаришлар омма дунёқараши ва кежалакка умид уйғота бошлаганини эътироф этишди. Қашқадарёлик фаоллар эса, ҳозирги мавжуд вазиятда демократик мухолифат жиддий ҳаракат қилса, ўзига хос самара бўлиши мумкин эканини урғулашди. “Бугунги мажлисга шунча одам кела олганининг ўзи ҳам вазиятнинг ёмон эмаслигини кўрсатмоқда. Демак, қайсидир жиҳатдан ишлаш мумкин бўлган жараён сезилмоқда. Отни қамчилашимиз керак” дейди “Бирлик”нинг қашақадарёлик фаоли Зулфиқор Мирзақулов.

Демократик мухолифатнинг ўзаги ва қон томири бўлган “Бирлик”нинг бугунги мажлисида фаолиятни жонлантириш, сафларни мустаҳкамлаш бўйича қарорлар олинди. Анча вақтдан бери дийдорлашмаган сафдошлар узоқ суҳбат қуришди. Партияни рўйхатдан ўтказиш масаласи бўйича “Бирлик” Партияси Марказий Кенгаши номидан Адлия вазирлиги ва Президент Шавкат Мирзиёга мактуб йўллашга келишилди. Шу билан биргаликда Шавкат Мирзиёга Ўзбекистон ва ўзбек миллатнинг бугунги ғариб аҳволи ва бу аҳволдан чиқиш учун нималар қилиш кераклиги ҳақида “Бирлик” Партиясининг таклифларини жўнатишга қарор қилинди.

Табиий, партиянинг фаолиятни жойларда жонлантириш, бугунги кабий иғилишларни 2-3 ойда бир ўтказиб, вилоятларда ҳам шунга ўхшаш йиғилишлар ўтказиб туриш, демократик мухолифатнинг бошқа қанотлари, жумладан, “Эрк” партияси билан ҳамкорликни чуқурлаштириш кераклиги ҳам таъкидланди.

Юқорида айтганимиздек, бугун Тошкентда бунча кишининг йиғилиши кутимлагани сабабли, йиғилганларнинг бир қисми мажлисда оёқда туришга мажбур бўлди. Мажлис ўтаётган кичкина хонада расм олиш имкони ҳам бўлмади. Шу сабабли, мажлис қатнашчилари ташқарига чиқиб умумий расмга тушмоқчи бўлдилар. Ўша пайтда бошланиб қолган ёмғир туфайли ҳамма йиғилиш қатнашчиларини кўрсатувчи расм ҳам олинмади. Кўраётган расмингизда Дайнов Ташанов, Самад Мурод ва яна бир неча киши йўқ.

Расмда олдинда Васила Иноят, зинада энг юқорида "Бирлик" Партияси Сирдарё ташкилотининг раиси Исроил Ризо.

Техник ва молиявий имконятлар ҳам бўлмади ва йиғилишни видеоконференция шаклида ўтказиб, уни ҳамма ерда кўрсатолмдик, дейди Дайнов Ташанов. Миллат ва ватанимизнинг келажаги учун “Бирлик” Партияси олиб бораётган курашнинг моҳиятини хали миллат тушуниб етгани йўқ. Аммо, бирликчилар ўз курашлари ғалаба қозонишига ва миллатниннг ўзи бу курашга қўшилишига ишонадилар.
« Олдинги хабар Хабарлар рўйхати Кейинги хабар »