12 December 2016
18:44 - Барак Обама Шавкат Мирзиёнинг давлат тепасига келишини янги давр деб атади
Ўзбекистон Ташқи ишлар вазирлигининг расмий сайтида АҚШ президенти Барак Обаманинг Шавкат Мирзиё йўллаган табрик телеграммаси эълон қилинди. Телеграммада Шавкат Мирзиёнинг президент бўлиб сайлангани Ўзбекистон учун муҳим янги даврни бошлаб бергани ҳақида гаплар бор. Барак Обама янги президентни минтақада ҳамкорликни ривожлантириш ҳамда халқаро муносабатларда мувозанатни сақлашга қаратаётган алоҳида эътиборини қўллаб-қувватлашини айтган.

“Шунингдек, Президент вазифасини бажарувчи сифатида муҳим соҳаларда, шу жумладан, иқтисодиёт ва қонун устуворлиги соҳаларида Сиз бошлаган ишларни катта мамнуният билан қайд этаман”, - дебди Обама.

Маълум бўлишича, Шавкат Мирзиё идорасига АҚШнинг янги сайланган президенти Дональд Трампдан ҳам худди шу мазмундаги қутлов келган. Шавкат Мирзиё ҳали биронта амалий иш қилмаганини ҳисобга олсак, мазкур номалар шунчаки мулозамат эканини тушуниш мумкин.

Лекин, шуни ҳам унутмаслик керакки, 20 асрнинг энг мудҳиш диктаторлари – СССРнинг Сталини, Испаниянинг Франкоси ва Португалиянинг Салазари ўлгандан кейин, у диктаторликлар бир неча йилда ўз мудҳишликларини йўқотганлар. Ўзбекистонда ҳам шундай бўлади. Бунда Шавкат Мирзиёнинг қандай роли бўлиши ҳали аниқ эмас.
« Олдинги хабар Хабарлар рўйхати Кейинги хабар »