Ўзбекистон Республикаси Бош Прокурорнинг буйруғига асосан, адлия полковниги Ботир Қудратхўжаев Тошкент шаҳар прокурори этиб тайинланди. Шу пайтга қадар мазкур вакант лавозимни вақтинча бошқариб келган Мираълам Мирзаев прокурорнинг биринчи ўринбосари лавозимига қайта ўтказилган. “Ҳуқуқ-АН” адвокатлик фирмаси адвокатига кўра, прокурор вазифасини бажариб келаётган Мирзаев 70 ёшдан ошган, шаҳар прокуратураси фаолиятини бошқарган сўнгги 5 ой давомида қатор сусткашликларга йўқ қўяётганди.

Қудратхўжаев эса, сўнгги йилларда Шарқий Ҳарбий Округ прокурори, Ўзбекистон Республика Ҳарбий Прокурорининг биринчи ўринбосари ва 2015 йил 31 октябрдан бери Сурхондарё вилояти прокурори лавозимларида ишлаган. Маълум бўлишича, у Тошкент шаҳри прокурорлигига ўтқизилишидан аввал президент Ислом Каримнинг юзма-юз суҳбатидан ўтган.

Мен ҳам Ислом Карим билан юзма-юз кўришган одамлардан бириман, дейди “Бирлик” Партияси лидери Абдураҳим Пўлат. Учрашув 1990 йилнинг биринчи шанбасида бўлган, бу ҳақда “Ҳаракат” сайтида эълон қилинган хотираларимда ёзганман. Ўшанда Ислом Каримнинг ташаббуси билан ўтказилган тахминан 2-2,5 соатлик учрашув пайтида, у киши мени “Яхши раҳбарлар ишлайдиган Ўзбекистон каби давлатларда мухолифат деган нарсанинг кераги йўқлиги, демократия деган нарса Ғарб тарафидан одамларни қулликда ушлаб туриш учун яратилан тузум эканлига” ишонтиришга уринган, мен у кишини ҳамма нарса бунинг тескариси эканлигига ишонтиришга ҳаракат қилганман. Суҳбат охирида у кишининг “Келишдикми?” деб чўзган қўлини фақат мен қилоладиган шаклда чиройли қилиб олмаганим ҳам ҳақиқатдир.

Табиий, Ботир Қудратхўжаев Ислом Каримга демократияни ҳам, мухолифатни ҳам йўқ қилиш хусусида ваъдалар берган бўлса керак, дейди мухбиримиз. Аммо, эндигина 42 ёшга кирган бу одам унутмаслиги керакки, диктаторлар ҳам оламдан ўтади, ундан кейин миллат олдида жавоб беришга тўғри келади. Сталиннинг бош жаллоди Лаврентий Берия бор-йўғи бир неча ойдан кейин жавоб бергани каби.