Ҳукуматнинг сиёсий буюртмаларини адо этувчи "Ижтимоий фикр" жамоатчилик фикрини ўрганиш маркази мустақилликнинг 25 йиллиги тантаналари олдидан Ислом Каримнинг кўнглини хушлайдиган яна бир сўров натижаларини имзолаб берди. Унга кўра, сўралган ҳамюртларимизнинг 98,9 фоизи мамлакатимизнинг буюк келажагига ишонади. Шунингдек, масхарабоз марказ вакиллари сўровнома иштирокчиларнинг 90 фоизи мамлакатда конституциявий қонунлар муваффақиятли ишлаётганига ишонишини таъкидлашга уринади. Буни қарангки, сўровда қатнашган 99,6 фоиз одам мамлакатдаги тинчлик ва барқарорликни мустақилликнинг энг асосий ютуқларидан бири, деб ҳисоблармиш.

Бўлса бордир, дейди мухбиримиз, гап бу ўринда “Ижтимоий фикр”нинг айнан кимлар ўртасида сўров олиб боргани-ю, сўровни қай тариқа ташкил қилганига боғлиқ, дейиш ҳам мумкин. Аммо, тахмин қилиш қийин эмаски, ҳеч қандай сўровнама ҳам ўтказилмаган, юқорининг буйруғи билан юқоридаги рақамлар эълон қилинган, холос. Чунки, ўзбек профессорлари қозоқ дворникларидан кам маош олишини ҳамма ўзбеклар билавермаса ҳам, аҳолининг катта қисми чет элларда қуллардек ишлаб, Ўзбекистондаги оилаларини тебратишаётганини билмайдиган одам йўқ.

Шундай одамлар Ўзбекистоннинг келажаги буюк эканлигига ишониши ҳақида гапиришнинг ўзи аҳмоқликдир.