01 August 2016
08:47 - Германияда ўтказилган туркларнинг митингида Ражаб Эрдўғон билан видео-конференцияга рухсат берилмади, ЕИ-Туркия алоқалари ёмонлашиб бормоқда
Кеча Германиянинг Келн шаҳрида Европанинг бошқа мамлакатларидан ҳам келган турклар иштирокидa ўн минлаб кишилик “Исёнга қарши демократия” митинги ўтказилгани ҳақида Туркия ахборот воситалари хабар қилдилар. Митингнинг мақсади – 15-16 июль кунлари Туркияда юз берган давлат тўнтаришига уринишни қоралаш ва мавжуд ҳукуматни қўллаб-қувватлаш ниятини намойиш қилиш бўлган. Германияда турли манбаларга кўра, 2-2,5 миллион турк яшашини, қўшни мамлакатларда ҳам турклар етарлича борлигини ҳисобга олсак, бундай катта митинг ўтказишда ортиқча қийинчиликлар бўлмаган.

Митинг ўз мақсадига эришди, Туркия ва Германия байроқлари билан тўлган митингда фатхулла-гуленчилар тарафидан уюштирилгани айтилаётган исён қораланди, Ражаб Эрдўғон раҳбарлигидаги Туркия ҳукумати европалик турклар тарафидан қўллаб-қувватланиши намойиш қилинди.

Бу митинг-намойишда Туркия вазирларидан бири, Туркияда ҳокимиятда бўлган Адолат ва Тарақиёт Партия раисининг ўринбосари, Туркия парламенти ва турли жамоат ташкилотларининг вакиллари ҳам қатнашдилар. Туркия Президенти Ражаб Эрдўғоннинг митинг қатнашчиларига мурожаати ўқиб эшиттирилди.

Хабарларда айтилишича, аввалига Эрдўғоннинг ўзи видео-конференция шаклида митинчиларга мурожаат қилиши режалаштирилган экан. Аммо, Германия Конституцион Суд бунга рухсат бермабди. Туркия Президентининг матбуот-котиби Иброҳим Қалин немисларнинг бу қарорини қоралаб, бу хусусда изоҳ талаб қилгани ҳам хабарларда айтилмоқда.

Жойи келгани учун айтиш керакки, Германия канцлери Ангела Маркел Туркияни давлат тўнтариши қилишга ҳаракат қилганларни жазолаш масаласида ҳаддан ошмасликка чақирди. Европаннинг бошқа давлат лидерлари ҳам шунга ўхшаш баёнотлар бермоқдалар.

Туркия ҳам жавобсиз қолаётгани йўқ. Туркия расмийлари Европа билан алоқалар ёмонлашиши, муҳожирлар муаммоси бўйича тузилган ЕИ-Туркия шартномаси бекор қилиниши ҳақида очиқча сигналлар бермоқдалар. Туркия ташқи ишлар вазири Meвлут Човушўғли “ЕИ октярь ойида туркларнинг ЕИга визасиз киришини қонунлаштирмаса, муҳожирлар масаласидаги шартномани бузамиз” маъносида таҳдидлар қилди. Маълумки, бу шартномага кўра, Туркия Сурия ва Ироқдан келаётган юз минглаб қочқинларнинг ўз ҳудудлари орқали Евролпага ўтишларига йўл бермайди, ўтиб бўлганларни қайтариб олади.

Туркия сўнги йилларда Россия билан яқинлашиш ва Европадан узоқлашиш йўлидан кетаётган пайтда, туркларнинг ЕИга визасиз кириши учун курашишнинг маъносини тушуниш қийин, аммо шундай кураш бўлмоқда.
« Олдинги хабар Хабарлар рўйхати Кейинги хабар »