Маҳаллий веб нашрларнинг ёзишича, БМТ икки йилда бир марта тузиладиган E-Government Development Index рейтингини эълон қилибди. Бу гал Ўзбекистон ушбу рейтингда 20 поғонага юқорилаб, 80-ўринни қайд этибди. Рейтинга жаҳоннинг 193 мамлакати киритилган бўлиб, рўйхат ушбу мамлакатларда электрон ҳукумат қай даражада ривожлангани турли критерийларга қараб тузилган.

Кучли ўнликка Буюк Британия Австралия, Жанубий Корея, Сингапур, Финляндия, Швеция, Нидерландия, Янги Зеландия, Дания ва Франция киритилган, дейди нашрлар. Ўзбекистон эса 0,5434 индекс билан 80-ўрин (Қозоғистон 33-ўрин)га муносиб кўрилибди.

БМТ ўта ножиддий ташкилот эканлигини ҳисобга олиб, бу хабарга ортиқча эътибор бериш ва Ўзбекистонда электрон ҳукумат кучаяётганига ишониш соддалик бўларди. Ҳамма нарса Ислом Каримнинг буйруғи билан қилинадиган Ўзбекистонда электрон ҳукумат амалда йўқ, бўлиши ҳам мумкин эмас. Аслида, ҳозир ҳам мавжуд ҳукумат кучли, аммо унинг кучлилиги диктаторнинг қонунларга зид бўлган буйруқларини тўла бажаришидадир. Халқнинг буйруқларини бажарадиган кучли ҳукумат яратиш – “Бирлик” Партияси ва “Ҳаракат” Агентлигининг олий мақсадидир.