21 March 2015
05:33 - Яманда яна даҳшат: Шиалар масчитларидаги портлашларда 140 дан ортиқ одам ҳалок бўлди, Ислом дини ислоҳотларга муҳтож!
Узоқ тарихни қўйиб туринг, Яманнинг шимолий қисми Усмонли Императорлигидан 1918 йили, жанубий қисми Буюкбританиядан 1967 йили мустақил бўлиб, аввалига ўзаро уриш ичида бўлишди. 1990 йили Яман Республикаси номи остида бирлашиш ҳам қон тўкилишининг олдини оломади. Энди аҳолининг 52 фоизини ташкил қилувчи суннийлар билан, 46 фоизини ташкил қилувчи шиалар қонли уруш ичида. Тўғридан-тўғри қуролли тўқнашувлардан ташқари, кечаги каби масчиталардаги портлашларда ибодат қилишга келган мусулмонлар бошқа мазҳабга оид мусулмонлар тарафидан ўлдирилмоқда.

Кеча пойтахт Санадаги шиаларнинг икки масчитида жума номози пайтида 3 портлаш юз берди. Уччала портлаш ҳам ўлимчи-террористлар тарафидан амалга оширилди. Аввалиги бир неча ўн кишининг ҳалок бўлгани ҳақида хабарлар тарқалди. Секин-аста қурбонлар сони ортиб бориб, шу пайтгача 142 кишининг ўлгани аниқлангани айтилмоқда. Ҳали ярадорлардан ҳам баъзилари оламдан ўтса керак.

Бир Оллоҳга ишонадиган, ягона пайғамабарни тан оладиган икки гуруҳнинг бундай қонли ишлари 21 асрда тушуниб бўлмайдиган даражада ақлсизликдек кўринади. Аммо, тарихдан маълумки, насронийлар ичида ҳам турли гуруҳларнинг, айниқса католиклар билан протестантларнинг қонли урушлари юз йиллаб давом этди. Ҳеч қайси тараф ғалаба қозонолмади ва ниҳоят бир-бирларига тоқатли бўлиб яшашага мажбур бўлдилар.

Русларнинг “ақлли одам бошқаларнинг, аҳмоқ эса ўзининг хатоларидан ўрганади” деган мақоли бор. Қизиқ, мусулмонларни ким дейиш керак?

Тўғри, масаланинг бошқа тарафини ҳам кўра билиш керак. Мазҳаблар ўртасидаги уруш ҳокимият учун кураш йўлида қурол бўлиб қолмоқда. Демак, Ислом дини дунёвийлик принципини тезроқ қабул қилиб, ҳокимият ишларига аралашмайдиган бўлса, мазҳаблараро урушнинг асосий сабабларидан бири бартараф қилинган бўларди.
« Олдинги хабар Хабарлар рўйхати Кейинги хабар »