Бугун бутун Россия бўйлаб “Россия-1” телеканалида аввалдан реклама қилиб келинаётган “Қрим. Ватанга йўл” номли хужжатли фильмни кўрстиш бошланди. Андрей Кондрашов тайёрлаган фильм ҳозирча Узоқ Шарқда кўрсатилаётгани ва унда нималар борлигини Алишер Усмоновнинг Gazeta.ru сайти қадамма-қадам ёритиб борди.

Владимир Путин бу фильмда Украинда Виктор Янукович ҳукумати АҚШнинг буйруғи билан ва унинг кўрсатмалари асосида украин миллатчилари тарафидан йиқитилишга тайёрланаётгани ҳақида аввалдан хабари бўлганини гапиради. Унинг иддаоларига кўра, миллатчилар ҳокимиятни қўлга олгач, аҳолиснинг асосийси руслар бўлган Қримда катта қан тўкишга тайёрланаётган эканлар. Бунинг оллдини олиш мақсадида Путиннинг шахсий топшириғи ва кузатуви остида Қримга 20 мингга яқин рус аскарлари аввалдан киритилган, Россиянинг ядровий қуроллари мамлакат бўйлаб урушга тайёр ҳолга келтирилишга тайёр бўлган.

Яъни, қисқа қилиб айтсак, Путин Қрим Россия тарафидан босиб олинганини феълан тан олди. У ўзининг мақсади Қримдаги русларнинг ҳаётини сақлаб қилиш деб гапирди, аммо Донбассдаги воқеалар бошланмасдан олдин Украинанинг ҳеч бир ерида биронта руснинг ҳатто бурни қонатилмаганини гўёки унутди.

Бу ҳужжатли фильмни кўрсатишдан мақсад – Путин Қрим ва Донбасс масалалсида чекинмоқчи эмаслигини очиқча эълон қилиш ва керак бўлса ядровий урушга тайёр эканлигини Ғарбга намойиш этиш бўлган. Зотан, бунга ҳеч кимнинг шубҳаси йўқ эди.

Вақти келгани учун айтиш керакки, “Бирлик” Партияси раиси Абдураҳим Пўлат 2008 йилдаги Россия-Гуржистон урушига баҳо берувчи “Кенигсберг-Курил муаммолари ва Россия- Гуржистон уруши” мақоласида шундай деган эди: “Ҳозирги Россияни Ўрта Шарқ мамлакатларида модага кирган тирик бомба-аёллар билан солиштириш мумкин. У бомба-аёлларнинг белида бир неча граната ёки бомбача боғланган, Россиянинг белида эскириб қолган бўлса ҳам дунёни йўқ қилоладиган атом ва ядровий бомбалар бор. Демак, Россияни куч билан енгиб бўлмайди. Аммо, Россия СССР деб аталган замонида ҳам шундай кучга соҳиб эди ва тинч йўллар билан парчаланди.” Бу мақола “Ҳаракат” журалининг 2008 йил 4(73) сонида ўзбек тилида, Россиянинг Центразия.ру ва Гуржистоннинг “Грузия-Online” сайтларида рус тилида эълон қилинган.

Владимир Путиннинг “Қрим. Ватанга йўл” номли хужжатли фильмида айтган гаплари Абдураҳим Пўлатнинг башоратлари қанчалик тўғри бўлишини яна бир марта исботламоқда, холос.

Бу мавзу билан боғлиқ яна бир қизиқ хабар бор. ТАСС агентлиги билдиришича, бугун Хитой Бош вазири Ли Кэцян худди Путинга тош отгандек шундай дебди: “Хитой Украинанинг ҳудудий бутунлиги ва суверенитетини тан олади. Биз умид қиламизки, бу масала диалог, музокара ва малаҳатлашувлар йўли билан ҳал қилинади.”

Бечора Путин бугун кўрсатилаётган ҳужжатли фильм билан маст бўлишни ҳаёл қилиб турганда, Пекиндан шапалоқ каби сўзлар келди. Чунки, Хитой Қрим Украинаники эканлигини гапирмоқда.