26 February 2015
23:03 - Ўзбекни дунё танимоқда: Нью-Йоркда ИШИДга алоқадор ики ўзбек ҳибсга олинди
АҚШ Федерал тергов бюроси вакиллари томонидан Нью-Йоркнинг Бруклин мавзесида яшаб келган ўзбекистонлик 24 яшар Абдурасул Жўрабоев ҳамда 30 яшар Аброр Ҳабибовлар ҳибсга олинди. Шунингдек, уларнинг шериги қозоғистонлик 19 яшар Аҳрор Саидахметов ҳам бор. Учовлон “Исломий давлат” гуруҳига молиявий кўмак беришга ҳаракат қилганлик ва Туркия орқали Сурияга ўтиб ИШИДга қўшилмоқчи бўлганликда айбланяпти.

Федерал тергов бюроси ходимларига кўра, Саидахметов 25 февраль куни Истанбулга учаётганида Кеннеди аэропортида ҳибсга олинган. Жўрабоев эса Истанбулга 29 март куни етиб бориши керак эди. У ярим тунда Флоридада қўлга олинган. ФБРнинг Нью-Йорк бўлими раҳбари ўринбосари Диего Родригез ҳибсга олинганлар АҚШда террор ҳужумларини амалга оширмоқчи бўлганларига урғу берди: “Гумонланувчилар "Исломий давлат" гуруҳига қўшилиш мақсадида Туркияга махфий тарзда учиб кетмоқчи бўлишган. Уларнинг айримлари агар учиб кета олишмаса, АҚШда террор амалиётларини содир этишни , жумладан, ФБР агентларига суиқасд уюштиришни режалаштиришган”.

25 феварль куни Жўрабоев ва Аҳмедов Бруклиндаги федерал судга, Ҳабибов эса Флоридадаги Жексонвил судига олиб келинди. Афтидан уларни яқин орада камида 15 йиллик қамоқ кутмоқда.

Қизиқ, дейди мухбиримиз, ўзбекларнинг ИШИД фаоллари билан ёзишмаларида қуйидаги сатрлар бор: “Мен ҳозир АҚШда яшайман¸ лекин ҳозирча қуролим йўқ. Бу ерда яшаб туриб ҳам ўзимизни шаҳидликка бағишлашимиз мумкинми? Масалан¸ Обамани ўлдириш учун худкушлик қилсак¸ шаҳид бўламизми? Бу билан биз кофирлар юрагига қўрқув соламиз-ку?”. Жўрабоевнинг ИШИД сайтидаги ëзувларидан олиган бу лавҳалар ўзбекларнинг нечоғли ботқоққа ботиб бораётгани кўрсаткичидир.
« Олдинги хабар Хабарлар рўйхати Кейинги хабар »