Reuters агентлигининг бугун ярим кечаси (Европада эрталаб, Тошкентда пешин соатлари) тарқатган хабарида айтилишича, Қозоғистон Президенти Нурсултон Назарбойнинг сабиқ куёви Роҳат Алиев бугун эрталаб Австриянинг пойтахти Венадаги қамоқхонада ўзини ўзи осиб ўлдирган.

Медицина фанлари доктори Роҳат Алиев Нурсултон Назарбойнинг катта қизи Дариганинг эри бўлиб, ўз вақтида қайин отасининг ишончли одамларидан бири эди, у Миллий Хавфсизлик Комитети раисининг ўринбосари, Ташқи ишлар вазирининг биринчи ўринбосари вазифаларида ишлаган. 2007 йил февраль ойида у тўсатдан Қозоғистоннинг Австиридаги элиси, айни замонда ўз мамлакатининг ЕХҲТ ва бошқа ташкилотлардаги вакили этиб тайинланиб, чет элга жўнатилди.

Айнан 2007 йилнинг февраль ойида Роҳат Алиев иккита банкирни ўлдириш ишларига алоқаси борлиги, катта ўғрилик ва коррупция билан боғлиқ ишларга раҳбарлик қилгани ҳақида гаплар пайдо бўлди. Кўринишидан, Нурсултон Назарбой булардан хабардор бўлгандан кейин, балки, ишни ёпти-ёпти қилвориш мақсадида ўз куёвини вақтинча Австрияга жўнатган.

Аммо, 2-3 ой ичида Роҳат Алиевга қарши жинолий ишлар очилди, элчлик вазифасидан олинди, уни ушлаш ҳақида қарор ҳам чиқарилди. У ўзига қўйилган айбларни тан олмади, ўзини Нурсултон Назарбойнинг мухолифатчиси деб эълон қилди ва юрт ташқарисида собиқ қайин отасига қарши фаолият олиб борди.

Аммо, охир-оқибатда Австрия Қозоғистоннинг йиллардан бери давом этаган талабларидан кейин Австрия Роҳат Алиевни ўтган йилнинг июнь ойида ҳибсга олди ва уни ўз мамлакатига экстрадиция қилиш учун керакли бўлган ҳуқуқий жараёнларни бошлади.

Тахмин қилиш мумкинки, Роҳат Алиев ўзини экстрадиция қилиш хусусида ижобий қарор чиқарилгани ёки чиқарилиши аниқ бўлгани ҳақида маълумот олган ва ўзини-ўзи осган. Бундан ташқари, ҳеч қандай шубҳа йўқки, собиқ куёв қайин отасининг соясида ўзи биан чиқиша олмай қолган одамларни жисмоний йўқ қилиш ва катта ўғриликлар билан шуғуллангани аниқ. Демак, уни Қозоғистонда ўлимга маҳкум қилишлари ҳам аниқ эди.

Қозоғистоннинг расмий давлат ахборот агентлиги Казинформ Роҳат Алиев ўзини ўзи осиб ўлдиргани ҳақида хабар ҳам тарқатгании йўқ, у ерда Роҳат Алиев ҳақидаги охирги хабар унинг ўтган йили Венада ҳибсга олингани ҳақида.

Ўзбекистонда Ислом Каримнинг расмий ва норасмий куёвлари ва бошқа яқин одамлари худди Роҳат Алиев каби жиноятлар қилишган ва қилишмоқда. Вақти келади, уларнинг ҳаммаси миллат ва мамлакат олдида жавоб беради. Ўзини осишга улгурганлар улгуради, улгурмаганлари керакли жазони суднинг ҳукми билан олади.

Reuters агентлигининг сайтидан олинган расмда – Дарига ва Роҳат (2005 йил).