23 February 2015
22:02 - ЕХҲТ кузатувчилари Тошкентга келди
Бугун Ўзбекистонга Европада Хавфсизлик ва Ҳамкорлик Ташкилотининг Демократик институтлар ва инсон ҳуқуқлари Бюросининг кузатувчилар миссияси келди. Март ойи охирида бўлажак президент сайлов кампаниясини кузатиш учун келган чекланган миссия вакиллари орасида Европа Иттифоқининг турли структураларидан вакиллар бор. 11 кишидан иборат бу чекланган миссияга италиялик элчи Каетана де Зулуета бошчилик қилмоқда. Сайлов кунигача ЕХҲТ кузатувчилари сони 20 нафарга етиши кутилаяпти.

Миссия бугун Ўзбекистон Марказий Сайлов Комиссиясидан тегишли тартибда рўйхатдан ўтди ва кузатув фаолиятини бошлади. Миссия штаби пойтахт Тошкентда жойлашган, кузатувчилар эса мамлакатнинг турли минтақаларига кузатиш ишларини олиб бориш учун сафар қилади. Миссия аъзолари кейинги ҳафтада пресс-конференция ўтказади.

“Бирлик” Партияси раиси Абдураҳим Пўлат бу ташкилотнинг Қирғизистонда ўзбеклар қирғини қилинишига эътибор бермаганини ҳам мисол қилиб кўрсатиб, бу ташкилотни “мурда” деб баҳолаган, ундан аввалроқ АҚШ парламентининг Европада Хавфсизлик ва Ҳамкорлик масалалари билан шуғулланувчи Хельсински комиссиясининг йиғилишини намойишкорона тарк этган эди.

Бу "мурда" ташкилот Ўзбекистонда нима қилоларди? Ҳеч нарса. Ҳамма нарсани ўзбекларнинг ўзи қилиши керак. Акс ҳолда, қулликдан чиқолмаймиз. Бирон нарса қилишнинг ягона йўли - “Бирлик” атрофида бирлашишдир. Аммо, ўзбеклар буни тушуниш даражасига ҳали етиб келгани йўқ. “Бирлик” кутиш билан чекланмаяпти, у жараёнларни тезлаштириш учун тинимсиз ҳаракат қилмоқда.
« Олдинги хабар Хабарлар рўйхати Кейинги хабар »