09 February 2015
08:00 - Сенсация: Тошкентдаги автоҳалокатда одам ўлибди, яшасин Ислом Карим!
Ўзбекистон режимининг қўғирчоқ ахборот воситалари 7 фераль куни Тошкентда Кичик Ҳалқа йўлининг “Фарҳод бозори”га яқин қисмида BМW ва Cаptiva автомобиллари иштирокида йўл транспорт ҳодисаси содир бўлгани ва бир одам ўлганини “Водители Ташкента” номли гуруҳга асосланиб хабар қилдилар.

Ростакам сенсация. Ахир Ислом Карим раҳбарлик қилаётган мамлакатда одам ўладиган автоҳалокат бўлиши мумкинми? Бунга ўзбеклар қандай ишонади? Бу воқеани қўғирчоқ бўлса ҳам расмий ахборот воситаси ҳисобланадиган нашрлар хабар қилишига қандай чидаш мумкин?

Бечора Ислом Карим! У кеч бўлса ҳам орқага чекиниб, иккита автомобиль уришиб кетгани, бир одам ҳалок бўлгани ҳақида хабар тарқатишга шахсан ўзи рухсат бергани шубҳасиз. Офарин Ислом ака, дейиш керакмасми?

Ўқувчиларимизнинг эсида бўлса, 2 йилча аввал Ислом Каримнинг рухсати билан Самарқанддаги ҳожатхоналардан бирининг ифлослиги ҳақида расмий ахборот воситаларида хабар тарқатилганини билдирган эдик. Шундан кейин ҳожатхоналарни ялаб тозалайдиган бўлишди шекилли, бошқа бунақа хабар чиқмади.

Мана энди шаҳар кўчаларида автомобилларни қўлда кўтариб юришади, автоҳалокатлар ҳам юз бермайди, ҳеч ким ҳалок бўлмайди. Ана ундан кейин ҳаммани президентлик сайловларида олқишлар билан Ислом Каримга овоз беришга чақиравериш мумкин.

Ҳожатхоналар тоза бўлса, автоҳалокатлар бўлмаса, бу – Ўзбекистон буюк келажакка етиб борганининг кўрсатгичи-ку! Миллионлаб ўзбеклар чет элларда мардикорлик қилиши, Қозоғистонда ўртача ойлик биздан 8-10 баравар кўплигини сир сақлаш давом этаверади. Бу нарсаларни бир марта хабар қилишга 20-30 йилдан кейин рухсат берилса керак.
« Олдинги хабар Хабарлар рўйхати Кейинги хабар »