Париж марказида бўлган икки майдон – Республика майдонидан Миллий майдонга бирлик-бирдамлик юришида қатнашиш учун одамлар бир неча соатдан бери Республика майдонига тўпланмоқдалар (расмда). Бу ерда ҳозирнинг ўзида юз минг атрофида одам бор.

Юришда қатнашиш учун 40 тан ортиқ давлатларнинг раҳбарлари Парижга етиб келишди. Уларнинг ичида Германия канцлери Ангела Меркел, Украина Президенти Петр Порошенко, Буюкбритания, Италия, Испания бош вазирлари Дэвид Кэмерон, Матео Рензи, Мариано Рахой, Еврокомиссия раиси Жан-Клод Юнкер бўлиши кечаёқ хабар қилинганди.

Кутилганидек, бу ерга бугун Исроил Бош вазири Беньямин Натаняху ва кутилмаганда Туркия Бош вазири Аҳмат Довудўғли ҳам келди. Россия эса, ташқи ишлар вазири Сергей Лавровни юбориш билан чекланибди. Европанинг сал кам ҳамма мамлакатларидан бош вазир ёки ташқи ишлар вазири даражасидаги вакиллар келган.

Франция Президенти Франсуа Олланд меҳмонлар билан кўришиб, “Париж бугун дунёнинг марказига айланди”, деди. Ростдан ҳам шундай, чунки, жуда кўп мусулмон мамлакатларидан ҳам юқори даражали арбоблар бу ерга етиб келишди.