2014 йил 30 декабрь куни рус ва украин ахборот агентликларига асосланиб, “Нормандия тўртлиги” иштирокчилари - Россия Президенти Владимир Путин, Германия канцлери Ангела Маркел, Франция Президенти Франсуа Олланд ва Украина Президенти Петр Порошенко – Қозоғистон Президенти Нурсултон Назарбойнинг таклифи билан Украинадаги кризисдан чиқиш йўлларини муҳокама қилиш учун 15 январда Остонага келишларини “Ҳаракат” Агентлиги ҳам билдирган эди.

Аммо, янги йилнинг биринчи кунлари Нурсултон Назарбой Остонда бўлиши мумкин бўлган йиғилиш хусусида гаплашилганини айтиб, ўзи бундай йиғилишга тайёр эмаслигини кўрсатгандек бўлди. Кейин тўсатдан у Берлинга Ангела Маркел билан учрашувга бориши эълон қилинди. Ва ниҳоят у бугун аввал Маркел, кейин Германия ташқи ишлар вазири Франк-Вальтер Штайнмайер билан учрашди ҳам. Бу ҳақда қозоқларнинг расмий давлат агентлиги Казинформ хабар қилди. Хабар умумий гаплардан иборат. Икки лидер Германия-Қозоғистон муносабатлари, Украинадаги кризис ва ўзаро инновацион-инвестицион ҳамкорлик ҳамда Остонада ўтказиладиган ЭКСПО-2017 кўргазма ҳақида гаплашишибди. Франк-Вальтер Штайнмайер эса, Қозоғистонни Марказий Осиёнинг барқарорлик лангари дебди.

Яна ўша Казинформнинг хабарига кўра, учрашувдан олдин Нурсултон Назарбой Россия Президенти Владимир Путин билан телефонда суҳбатлашган. Хабарда айтилмаган бўлса ҳам тахмин қилиш мумкинки, у Путиндан кўрсатмалар олган бўлса керак.

Бу хабарларда ҳам Остонда 15 январга режалаштирилаётган “Нормандия тўртлиги” йиғилиши хусусида мужмаллик бор. Кўринишидан, Нурсултон Назарбой бундай катта ўйинга киришдан хавотирда ва ҳалигача бир қарорга келгани йўқ.