30 December 2014
12:45 - Путин яна тиз чўкди: Ўзининг душмани деб ҳисоблайдиган Навальнийга 3,5 йиллик шартли жазо берди
1976 йилда туғилган Алексей Навльний 1997 йидан бери ўнга яқин ширкат қуриб, унча тушуниб бўлмайдиган ишлар қилган ва ўрта миён бойга айланган бўлса ҳам, у асосан мухолифатчилиги ва Россияда коррупцияга қарши энг фаол курашчилардан бири сифатида танилган.

Алексей Навальний 2011 йилнинг охирида бошланиб, 2012 йилнинг 7 майида Владимир Путин янгидан президент бўлиб сайланунча ўтган вақт ичида ва ундан кейин ҳам давом этган мухолифатнинг катта намойишларда ташкилотчиларидан бири сифатида иштирок этиб, феълан мухолифат лидерларидан бирига, баъзиларга кўра, бош лидерга айланди. 2013 йили Москва шаҳар мэри бўлиб сайланиш учун ҳаракат қилди, бироқ 27,24 % овоз олиб, ҳозир мэр бўлиб ишлаётган Сергей Собянинга ютқазди. Аммо, бу сайлов ҳам унинг обрўсини юксалтирди, у келажакда Путин билан рақобат қилиши хусусида гаплар кўпайди.

Ҳеч шубҳасиз, айнан шу сабабдан, Путин Президентликка сайлангач, Алексей Навльний ва унинг укасига қарши уларнинг бизнеслари бўйича бир қатор жиноий ишлар очтирди. У ва унинг укаси бир йилчадан бери уй қамоғида эдилар.

Бу ишлардан бири бўйича прокуратура Алексей Навльний ва унинг укаси Олег учун 10 йилдан қамоқ жазоси талаб қилди. Суднинг ҳукми 2015 йил 15 январда эълон қилиниши билдирилганди. Аммо, 2 кун аввал суд ўз қарорини 30 декабрда чиқаришини эълон қилди. Бугун шундай бўлди ҳам.

Суд кутилмаганда, Алексей Навальнийга 3,5 йил шартли жазо, укасига эса 3,5 йиллик қамоқ жазоси ҳукми чиқарди. Уларнинг ҳар биридан 4 млн рублдан жарима олинади, иккаласи ҳозирча уй қамоғида қолишади. Адвокатлар бу ҳукмлар бўйича апелляция аризаси бермоқчи.

Табиий, прокуратура 10 йил қамоқ талаб қилиб турганда, Алексей Навальнийга тўсатдан шартли жазо берилиши – Путиннинг Ғарб олдида тиз чўкишидир. Чунки, Россиянинг Украинадаги зўравонлиги учун Ғарб унга қарши кучли санкциялар киритди, натижада, Россиядек давлатнинг иқтисоди жиддий ўлчовда ботишга бошлади. Ғарб санкцияларни яна кўпайтириш ниятида. Шундай пайтда ҳозир бутун жаҳонга танилиб бўлган Путиннинг мухолифатчиси Алексей Навальний қамалса, санкциялар яна ҳам ортарди.

Нима ҳам дердик: бечора Путин.
« Олдинги хабар Хабарлар рўйхати Кейинги хабар »