Хитой давлат тараққиёт банки Ўзбекистон телекоммуникация тизимини модернизация қилиш учун 100 миллон АҚШ доллари миқдорида саромоя киритади. Ўзбекистон Алоқа, ахборотлаштириш ва телекоммуникация технологиялари давлат қўмитасининг «Infocom.uz» сайтида эълон қилинган маълумотда айтилишича, лойиҳанинг умумий қиймати 117 миллион АҚШ долларига тенг.

Ушбу лойиҳалар ахборот узатиш магистрал тармоқларининг ўтказиш қувватини халқаро йўналиш бўйича 10 баробар (100 Гбит/сония), вилоят марказлари бўйича 4 баробар (40 Гбит/сония) ва туман марказлари бўйича 10 баробар (10 Гбит/сония) оширишни назарда тутади, деб ёзади сайт.

Шунингдек, ушбу қарор доирасида кенг полосали оптик тармоқларни ривожлантириш ҳам кўзда тутилган бўлиб, 6,9 миллион долларга Тошкент шаҳридаги абонент линияларини модернизация қилиш ва 69 минг 120 портда кенг полоса бўйлаб ахборот узатишни таъминлайдиган қурилмаларни ўрнатиш кўзда тутилган.