Мамлакатимизнинг қўғирчоқ ахборот воситалари Ислом Карим Ўзбекистон Конституциясининг 22 йиллиги муносабати билан ўтказилган мажлисда нутқ сўзлаб, давлатнинг иқтисоддаги иштироки даражасини камайтириш тўғрисида гапирганини хабар қилишди. Наҳотки, бу соҳта иқтисодчи иқтисодни энди тушунишга бошлади? Унинг ақли 24 йил аввал қаерда эди?

Нима учун 24 йилни эсладик? Чунки, айнан 24 йил аввал, аниқроғи, 1990 йил июль ойида Москвада ўтган КПССнинг 28-чи съездида, табиий, Михаил Горбачевнинг ташаббуси билан чекланган (ёки бошқариладиган) бозор иқтисодига ўтиш, яъни давлатнинг иқтисоддаги иштирокини кескин даражада камайтириш қарори олинди. Бу қарор – ўлаётган социалистик иқтисодни тиклаш йўлида инқилобий ўзгаришларга йўл очиши муқаррар эди.

Аммо, КПСС таркибида ҳали кучга эга бўлган реакцион кучлар ва шахслар бу қарорни йўқ қилиш ҳаракатига тушдилар. 1991 йил 19 августдаги ГКЧП фитнасининг мақсадларидан бири бозор иқтисодига ўтишни тўхтатиш эди.

Кўпчилик ўзбеклардан яшириб келинаётган ҳақиқат шундан иборатки, ўша пайтдаги Ўзбекистон Компартиясининг биринчи котиби Ислом Карим ўша реакцион шахслардан бири эди ва феълан ГКЧПнинг аъзоси бўлган.

Бунинг исботи борми, дейдиган аҳмоқлар чиқишини ҳам биламиз ва уларга жавоб берамиз: “Ҳа, исботи бор.”  Мана улардан фақатгина биттаси.

КПССнинг 28-чи съездидан кўп ўтмасдан, Коммунистик Партиянинг Тошкент вилоят конференцияси бўлиб ўтди. Конференциянинг қарори шундай: “Компартиянинг съездида қандай қарор олингани бизни қизиқтирмайди, биз коммунистик ғоянинг асослари бузилишини истамаймиз, ҳеч қанақа бозор иқтисодига ўтмаймиз.”

Наҳотки, коммунистларнинг Тошкент шаҳар ташкилоти Ислом Каримнинг буйруғи билан шундай қарор чиқарганига ишонмайдиган аҳмоқ ўзбек бор?

Ислом Карим ўша пайтдан бери бозор иқтисодига ўтишга қарши эди ва шу кунгача қарши бўлган. Айнан шу туфайли мустақил Ўзбекистоннинг псевдо-социалистник иқтисоди чуқур инқироз ичида ўлмоқда. Ислом Карим дўконларни ва майда-чуйда корхоналарни, ҳатто, қишлоқ хўжалигини хусусий қўлларга ўтказгани ҳам шунчаки ўйин эди. Ҳамма нарса давлат назорати остида бўлиб, ҳеч ким ўз ташаббуси билан истаган ишини қилолмасди. Масалан, пахта етиштирадиган фермерлар бир грамм пахталарини ҳам ўзлари истган жойда ва истаган нархда сотишга ҳақлари бўлмаганини ҳамма билади.

Мана, кўриб турибмизки, Ислом Каримнинг ўзбек миллати ва Ўзбекистон давлатининг манфаатларига қарши олиб борган жинояткорона сиёсати натижасида ҳамма нарса ҳароб бўлди, Ўзбекистон ўз иқтисодининг кучи билан Қозоғистондан 8-10 баравар орқада қолди. Аҳолининг ўртача ойлиги бўйича ҳам қозоқлардан шунча орқадамиз. Ўзбек профессорлари қозоқ дворникларидан кам маош олишади. Ал-Хоразмий ва Мирзо Улуғбекнинг авлодлари бўлган ўзбек халқи мардикорлар подасига айланмоқда.

Хўш, Ислом Каримнинг ақли 24 йилдан кейин кириб, ниҳоят Ўзбекистон иқтисодини давлат назоратидан чиқариб, бозор иқтисодига ўтказмоқчими? Йўқ.

“Бирлик” Партияси ва “Ҳаракат” Агентлиги Ислом Каримнинг сиёсати Ўзбекистонни ҳалокатга олиб кетаётгани ҳақидаги фактларга асосланган хабарларни, ҳукуматнинг ва мухолифат ичида ҳам хира пашшадек кўпайиб кетган ҳаромийларнинг саъйи-ҳаракатларига қарамасдан, халққа етказиб бормоқда. Бунга жавоб сифатида Ислом Карим навбатдаги ўйинини қилишга мажбур бўлмоқда. У навбатдаги ўйинга эмас, ҳақиқий ўзгаришларга кирмоқчи бўлса, бу гапларни 24 йилдан бери гапириб келаётган “Бирлик” фаолларига раҳмат айтишдан иш бошлаган бўларди.

Унинг иқтисоддаги ҳукуматнинг иштирокини камайтирш ҳақидаги лофлари “Ҳаракат” сайтида аввал ҳам келтирилган бир латифани эсалатади, холос. Мана ўша латифа.

КПСС ва СССРнинг 1965-1982 йиллардаги хўжайини Леонид Брежнев Хитойга расмий ташриф буюриб, аэропортдаёқ нутқ сўзлабди.

Азиз хитойлик дўстларим, деб сўз бошлаган Брежнев таржимоннинг таржимасини кутибди. Таржимон “Алжи бо” дебди. Бундан кейин Брежнев қанчалик узундан-узун баландпарвоз сўзлар айтмасин, таржимон уларни бир оғиз “Алжи да” дея таржима қилибди. Брежнев нутқини тугатиб, СССР-Хитой абадий дўстлиги давом этишини айтса, таржимон “Алжи ту” деб таржима қилибди.

Резиденциясига жойлашгандан кейин, Брежнев ўзининг Хитойдаги элчисидан сўрабди: “Хитой тили шунчалик мукаммалмики, бутун нутқимни бир неча жумла билан таржима қилишди” деса, элчи жавоб берибди: “Алжи бо” дегани хитойчасига “алжирашни бошлади”, дегани, “Алжи да” – “алжирашни давом эттирмоқда”, “Алжи ту” эса "алжирашни тугатди", дегани.

Шунга қиёс қилиб айтиш мумкинки, ўзбек халқини одам ҳам ҳисобламайдиган Ислом Карим кеча навбатдаги “алжи бо, алжи да ва алжи ту”сини қилди.

Ўзбек халқи ва Ўзбекистонни бугунги аҳводан қутқаришнинг ягона йўли, ҳозирги режимни тезроқ ағдаришдир. Аммо, бунинг учун авваламбор ўзбекларни ростдан ҳам одам қилиш керак. Акс ҳолда, яна бошқа битта аҳмоқ устимизга келиб, “алжи бо, алжи да ва алжи ту” қилишни давом эттираверади.

Расмда – Ислом Каримнинг “алжи бо, алжи да ва алжи ту”сига кечаги йиғилишда чапак чалаётган қорамоллар.