Аввалги хабарларимиздан маълумки, Нью-Йорк фондлар биржасининг асосий кўрсатгичи Dow Jones индекси сўнгги ойларда 17 мингдан бироз юқорида бўларди, аммо у сентябрь ойининг ўрталаридан кутилмаганда катта ўлчовда тушишга бошлаб, октябрь ойнинг ўрталаригача 1 мингчага пасайди. Биржа экспертлари бу тушишнинг сабаби сифатида Эбола касаллигининг Америкада ҳам тарқалиши, жаҳон иқтисодида ўсиш тезлиги камайиш эҳтимоллиги ва АҚШда марказий банк вазифасини бажарувчи Федерал Резерв қарзга бериладиган пул учун фойда фоизини оширишга шошилмаётганини кўрсатишган эди.

“Ҳаракат”нинг фикри бошқачароқ бўлди: “Жаҳонда Нью-Йорк фондлар биржасининг келажагига салбий таъсир қиладиган жиддий жараёнлар бўлаётгани йўқ. Биржа бекорга талвасага тушди, тезда ҳамма нарса ўз ўрнига тушади.”

Кейинги жараёнлар айнан “Ҳаракат” айтгандек бўлди. Мана 3 ҳафтадирки, Dow Jones индекси асосан юксалмоқда. Ўтган ҳафтанинг охирги иш куни 31 октябрда у 17390 га чиққан эди.

Жорийдаги ҳафтада ҳам биржада ўсиш бўлди. Ҳафта давомида Dow Jones индкси бир неча марта тарихий рекордлар қўйди. Кеча куннинг ўрталарида яна рекорд ўрнатилди – 17575. Кейин бироз тушиш бўлиб, иш куни битганда Dow Jones 17574 га тенг эди. Хуллас, ҳафталик ўсиш 180 бўлди.

Ўтган ойда АҚШда ишсизлик даражаси яна бироз пасайиб, 5,8% га тушгани эълон қилинди. Бу молиявий-иқтисодий кризис бошланган 2008 йилнинг кўрсатгичидан ҳам бироз паст. Демак, АҚШ кризисдан чиқиб бўлди. Шундай бўлса ҳам, Федерал Резерв бериладиган қарз учун олинадиган фойда фоизини оширмаяпти. Ваҳоланкги, иқтисод юксалаётганда бу фоиз ҳам ортиб бориши керак.

Федерал Резерв эътиёткорлик қилаётганга ўхшайди. Келаётган йилнинг биринчи ойларидаёқ фоиз ставкаси оширилса керак.

Вақтдан фойдаланиб, авваллари ҳам кўп марта такрорлаган фикримизни яна қайтарамиз.

АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.