05 November 2014
23:33 - Дунёнинг энг таъсири кучли кишиларининг 2014 йил рўйхати бошига яна Владимир Путин чиқарилибди
Дунёнинг бойлари, таъсири кучли кишилари каби рўйхатлар тузишда мутахассислашган Форбес журнали 100 кишини ўз ичига олувчи “Дунёнинг энг таъсири кучли кишилари - 2014” рўйхатини эълон қилди. Биринчи ўринга, ўтган йили каби, Россия Президенти Владимир Путин чиқарилибди. Иккинчи ўринда АҚШ Президенти Барак Обама, учинчи ўринда ХХР раиси Си Цзиньпин.

Кейинги ўринларда Рим Папаси Франциск (4-чи ўрин), Германия Канцлери Ангела Меркель (5), АҚШнинг Федерал Резерв раиси Жанет Йеллен (6), дунёнинг энг бой одами ва филантроп Билл Гейтс (7), Европа Марказий Банки раҳбари Марио Драги (8) ҳамда Google асосчилариЛарри Пейжва ва Сергей Брин (9).

Росиядан бу юзликка яна уч киши кирган. Булар - “Роснефть” ва “Газпром” раҳбарлари Игорь Сечин ва Алексей Миллер ҳамда ўзбек аслли миллиардер бизнесмен Алишер Усмонов. Усмонов ўтган йили ҳам рўйхатда бор эди.

Рўйхатда Шимолий Корянинг 31 ёшли диктатори Ким Чен Ин (49 ўрин) ва ИШИДнинг Халифаси 43 ёшли Абу Бакр Ал-Боғдодий (54 ўрин) ҳам бор.

Инглизчада бу рўйхатни “The World's Most Powerful People 2014” (Дунёнинг энг қувватли кишилари - 2014) деб аташган. Биз уни “Дунёнинг энг таъсири кучли кишилари - 2014” деб атадик. Аслида, инглизларнинг “Most Powerful”, ўзбекчадаги “энг қувватли” ва “энг таъсири кучли” ифодалари бу рўйхатдагиларнинг мураккаб сифатини тўла ифодалай олмайди. Лекин, бу рўйхат, маълум маънода, унга киритилган кишиларнинг қуввати, таъсир кучи, бойлиги, ўз давлатининг мавқеи ва бошқа жиҳатларининг йиғиндисини ўзида акс эттиради.
« Олдинги хабар Хабарлар рўйхати Кейинги хабар »