АҚШ Қуролли кучлари Бош штабининг бошлиғи Мартин Демпей раҳбарлигида ИШИДга қарши коалицияга кирган 21 давлатнинг турли даражадаги ҳарбий қўмондонлари кеча Вашингионда тўпландилар. Коалицияга кирган давлатларнинг рўйхати хабарларда келтирилмайди. Аммо, АҚШ Президенти Барак Обама йиғилишда қисқа нутқ сўзлагани алоҳида таъкидланади. Табиий, йиғилишга оид тафсилотлар ҳарбий сир бўлгани учун хабарларда берилмаган.

Айни замонда, ИШИД кучлари Суриянинг Туркия чегарсидаги сўнгги йилларда курд жангариларининг назорати остида бўлган Кобани шаҳрини 1 ҳафтадан бери секин-аста қўлга олмоқдалар. Ироқда эса, ИШИДнинг 10 минг кишилик қуролли кучлари Боғдод аэропортига 12 километргача яқинлашиб қолди. Улар тезда Боғдодни қўлга оламиз дейишмоқда. Шаҳар атрофида тинч аҳоли борлигини ҳисобга олиб, АҚШ ва унинг ҳамкорлари бу ерларда ИШИДга ҳаводан ҳужумларни тўхтатишди.

Худди Украинада бўлаётгани каби, ИШИД атрофидаги воқеалар ҳақидаги хабарлар анчагина чалкаш. Чалкашликнинг сабаби, кечаги хабарларимизнинг бирида айтилганидек, ИШИД артофида ҳар ким ўз ўйинини ўйнаётганидир.

Кеча АҚШ Давлат Котиби Жон Керри ва Франция Президенти Франсуа Олланд, худди “Ҳаракат” агентлигининг хабаридаги таҳлилларга асослангандек, имо-ишоралар билан Туркияни ўз ўйинини ўйнамасликка, умумий мақсад йўлида ҳаракат қилишга чақирдилар.

Охир-оқибатда ИШИД йўқ қилинади. Аммо, бу қанчалик тез бўлишини ҳозир тахмин қилиш қийин.