Аввалги куни 310 дан ҳам кўпроқ поғанга тушиб кетган Dow Jones индекси кеча ҳам шу йўналишда ишлади. Жорийдаги ҳафтанинг охирги иш куни Нью-Йорк фондлар биржаси бекилганда Dow Jones индекси 16544 га тенг эди. Яъни, бир кунлик тушиш 115 (0.69%).

Сабаб ўша-ўша: Жаҳон иқтисодининг ўсиш даражаси кутилгандан камроқ бўлиши мумкин.

Шундай бўлишини Халқаро Валюта Фондининг раҳбари Кристина Лагард кеча яна тасдиқлабди.

Қаранг, жаҳон иқтисоди ўсиши аниқ, аммо ўсиш даражаси кутилгандан камроқ. Нью-Йорк фондлар биржаси шу ерда ҳам сезгирлигини кўрсатмоқда.

“Ҳаракат” аввал башорат қилгандек, Dow Jones индекси тушиши вақтинчаликдир. Катта компаниялар жаҳон иқтисодининг ўсиш даражасининг камлигини ҳисобга олиб, ўз ишларида керакли ўзгаришларқи қиладилар, Нью-Йорк фондлар биржаси ўзини тиклаб олади. Аслида, Нью-Йорк биржасининг хатоси эмас, ўта сезгирлиги ҳақида гапириш керакдир.

Нима бўлганда ҳам, авваллари кўп марта такрорлаган фикримизни яна қайтарамиз.

АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.