29 September 2014
00:35 - Каспий саммитида қатнашиш учун Астрахонга Эрон президенти келди
Астрахонда бугун бошланадиган Каспий саммитида иштирок этиш учун кеча кечқурун бу ерга биринчи бўлиб Эрон Президенти Ҳасан Роухони етиб келди. У Астрахон вилояти ҳокими (губернатори) Александр Жилкин билан учрашгани Россия агентликлари тарафидан хабар қилинди. Ҳасан Роухони ва Александр Жилкин бир-бирларига икки тарафни ҳам хурсанд қиладиган чиройли сўзлар айтиб вақт ўтказишибди.

18 йилдан бери ўтказиб келинаётган Каспий саммитида Россия, Озорбайжон, Эрон, Қозоғистон ва Туркманистон президентлари иштирок этади. Бу саммит тўртинчи экан.

СССР парчаланиб, унинг таркибидаги Россия, Озорбайжон, Қозоғистон ва Туркманистон мустақил давлат мақомига эришгандан бери, Каспийнинг мақоми хусусида келишмовчиликлар мавжуд. Тўғрисини айтса, унинг мақомини белгилайдиган биронта ҳужжат қабул қилинмаган.

Астрахандаги учрашувда 2010 йили Бокуда бўлиб ўтган саммит қарорлари қандай бажарилаётгани ва Каспийбўйи давлатларнинг ўзаро ҳамкорлиги билан боғлиқ масалалар муҳокама қилиниши кутилмоқда.
« Олдинги хабар Хабарлар рўйхати Кейинги хабар »