Евгений Евтушенков 7,7 миллард долларлик бойлиги билан Россиянинг бойлар рўйхатида 20-чи ўринда туради. Унинг асосий бойлиги - Акционерлик Молиявий Корпорация “Система”нинг, турли манбаларга кўра, 64 дан 75 фоизгача акцияларидир. Бир вақтлар ҳиндлардан сотиб олинган Shyam Telelink уяли телефон оператори асосида яратилган ва МТС бренди остида ишлайдиган Sistema Shyam TeleServices Ltd. (SSTL) ширкатининг 73 фоизи “Система”никидир. “Система”нинг таркибида бир неча йил аввал сотиб олинган “Башнефть” компанияси ҳам бор.

Иқтисод фанлари доктори Евгений Евтушенков Россия Саноатчи ва Тадбиркорлар Иттифоқи Бюросининг аъзоси, унинг комитетларидан бирининг раиси, Россия Президенти қошидаги Фан ва Юксак Технологиялар Кенгашининг аъзосидир.

Шу сабабли Ислом Каримнинг Фуҳуша лақабли қизи Гулнора шведлардан олинган бир неча юз миллион долларлик пора эвазига МТСнинг Ўзбекистондаги бўлими “Ўздунробита” ширкатини Швеция ва Финландиянинг Telia-Soneria компаниясига бердириб юбориши русларнинг, ҳатто Владимир Путиннинг ғазабини келтирди. Айнан Путиннинг талаби билан Ислом Каримнинг ўзи бу ишга шахсан аралашиб, МТСнинг Ўзбекистонга қайтишига рухсат бердирди ва қизини уй қамоғига ташлатди.

Ҳамма Евтушенковнинг МТС ширкати ғолиб сифатида Ўзбекистонга қайтишини кутаётганда, Евтушенковнинг ўзи балога учради. Шу йил 16 сентябрда “Башнефть”нинг акцияларини ўзлаштиришда йўл қўйилган ўғриликлар айби билан у жиноий ишга тортилиб, уй қамоғига солинди.

Ҳеч шубҳа йўқки, унга қарши ишлар Путиннинг рухсати, балки, кўрсатмаси билан қилинмоқда. Лекин, ҳатто рус ахборот воситалари ҳам Евтушенков атрофидаги ишларнинг моҳиятини тўла тушунмаяптилар. Евтушенковнинг адвокатлари мисли кўрилмаган катта пул – 300 млн рубль (салкам 8 млн доллар) эвазига уни уй қамоғидан гаровга чиқаришни сўрадилар. Суд бу хусусда ҳали қарорини бермади.

Ўзбеклар учун қизиқ бўлгани - Евтушенковнинг тақдири эмас, бу воқеалардан кейин Ислом Карим нима қилишидир.