24 September 2014
07:09 - АҚШ Сурияда фақат ИШИДни эмас, Ал-Қоидани ҳам урди, бин Ладеннинг куёви эса, Нью-Йоркда бир умрга қамалди
АҚШ ўз раҳбарлигида ИШИДга қарши феълан уруш бошлатиб, бу террористик гуруҳнинг Суриядаги ҳарбий манзилларини ҳам ўтган куни бомбардимон қилишга бошлаган эди. Бундай ҳужумлар учун, табиий, Суриядаги расмий ҳокимиятдагилардан рухсат ҳам олинмаган, улар бу ҳужумлар ҳақида огоҳлантирлмаган ҳам.

Энди маълум бўлишича, кеча АҚШ вақтдан фойдаланиб, Ал-Қоиданинг Суриядаги манзилларини ҳам узоқдан отилган ракеталар билан урибди. Бу ҳақда хабар берган Reuters агентлиги мухбирлари америкалик расмийларга асосланиб билдиришларича, ҳужум муваффақиятли бўлган, Ғарб учун сўзсиз хавфли бўлган Ал-Қоида ўчоқлари йўқ қилинган. АҚШ ҳужумларининг нишонларидан бири - асли Қувайтлик, Осама бин Ладеннинг бир вақтлар яқин одамларидан бири бўлган 33 ёшли Мухсин ал-Фадҳли бўлгани ҳам айтилмоқда. Аммо, унинг ўлиб-ўлмаганлиги ҳақида аниқ маълумот йўқ.

Кеча Reuters агентлиги яна бир қизиқ хабар тарқатди. Маълум бўлишича, айнан кеча Нью-Йорк суди бин Ладеннинг 48 ёшли куёви Сулаймон Абу Гайизни америкаликларни ўлдириш учун ҳаракатларда иштирок этиш, террористларга моддий ёрдам уюштириш каби айбловлар билан бутун умр озодликдан маҳрум этувчи ҳукм чиқарган. Ўзининг сўнгги сўзида Абу Гайиз араб тилида Қуръон парчаларини ёддан ўқиб, Оллоҳдан бошқа ҳеч ким олдида кечирим сўраш нияти йўқлигини айтибди.

Қўлда чизилган расмда: Судья Левис Капланнинг қаршисида Сулаймон Абу Гайиз (ўнгда) ва унинг адвокати
« Олдинги хабар Хабарлар рўйхати Кейинги хабар »