05 September 2014
13:25 - Муҳаммад пайғамбарнинг мақбарасини кўчиришмоқчими?
Маълумки, Муҳаммад пайғамбар Мадинадаги Ал-Набави масжидида дафн этилган, кейинчалик у ерга мақбара қурилган. Бу ер Исломнинг Каъбадан кейин иккинчи муқаддас жойи ҳисобланади. Ҳозир тарқатилаётган хабарларга кўра, гўёки Саудия Арабистонида Муҳаммад пайғамбарнинг ҳокини қайтадан ал-Баки қабристонига дафн этиш режалари бормиш. Чунки, айнан ўша ерда пайғамбарнинг отаси ва оила аъзоларининг кўпчилиги дафн этилган.

Бу хабарларга қанчалик ишониш мумкин? Бунинг учун хабарларни диққат билан ўқиш лозим.

Айтилишича, Муҳаммад ибн Сауд университетида домлалик қилувчи Ислом олими Али ибн Абдул-Азиз Саудия Арабистони ҳукуматига 61 саҳифалик яширин ҳужжат тайёрлаб, Муҳаммад пайғамбарни ал-Баки қабристонида қайтадан ва яширинча дафн этишни таклиф қилибди. Бундай таклифга қарши бўлган бошқа Ислом олими Ирфан ал-Алауи эса, у ҳақда хабар тарқатиб юборибди.

Россия ахборот воситалари бу хабарнинг манбаи сифатида Исроилда рус тилида иш олиб бораётган newsru.co.il сайтини кўрсатишмоқда. Бу сайтда Ал-Алауининг қуйидаги фикри ҳам берилган – бу таклиф Саудия Арабистонида радикал ваҳобийлик ғояси кучайиб бораётганининг кўрсатгичидир.

Суннийлар пайғамбарни илоҳийлаштиришга қаршилар. Шиалар тескари фикрда бўлгани сабабли, пайғамбарнинг қайтадан, бунинг устига яширинча дафн этилиши шиа-сунний қарама-қаршлигини яна ҳам кучайтириши муқаррар.

Қисқа қилиб айтсак, бу хабар орқасида гап кўп, аммо унга ишониш учун жиддий асос йўқ.

Расмда – Мадинадаги Ал-Набави масжиди мажмуасида жойлашган Муҳаммад пайғамбарнинг мақбараси.
« Олдинги хабар Хабарлар рўйхати Кейинги хабар »