Кеча Уэльсда бошланган НАТО саммити доирасида Туркия ва АҚШ президентлари Ражаб Эрдўғон ва Барак Обаманинг учрашуви аввалдан режалаштирилган экан. Ражаб Эрдўғон Озорбайжонга қилган сафаридан кейин Бокудан Уэльсга учаётган вақтида ўзи билан кетаётган туркиялик журналистлар билан суҳбат қилибди (расмда) ва ҳозир АҚШнинг Пенсильвания штатида яшаётган Фатхулла Гулен масаласини ҳам тилга олибди. Бу ҳақда Туркия матбуоти хабар тарқатди.

Ражаб Эрдўғон Фатхулла Гуленнинг исмини тилга олмасдан, Туркияда давлат ичида давлат қурган ташкилот борлигини, унинг маркази ҳозир Пенсильванияда эканлигини эслатиб, Обама билан гаплашганда ўша пенсильванияликни АҚШдан чиқариб юбориш ёки Туркияга беришни сўрамоқчи эканлигини айтибди. “У одам ҳеч қандай айби-майби йўқлигини гапирмоқда, ундай бўлса, келсин ва ҳамма нарсани шу ердан идора қилсин” дебди Туркия президенти.

АҚШ Фатхулла Гуленни ҳайдамаслиги ёки Туркия жўнатмаслиги аввалдан маълум. Эрдўғон ҳам буни жуда яхши билса керак. Чунки, Фатхулла Гуленнинг айби йўқ. Агар Туркияда давлат ичида давлат қурилган бўлса, давлат ичидаги давлатни йўқ қилиш - Туркиядаги мавжуд ҳокимиятнинг ишидир. Бу давлат Пенсильваниядан бошқарилаётганига ишониш қийин. Тўғрисини айтсак, бундай давлат Пенсильваниядан бошқарилаётганини гапириш - Фатхулла Гуленнинг обрўсини оширишга хизмат қилади, холос.