Ҳа, Ислом Каримни иқтисоднинг асослари, азларига ўргатиш учун Қозоғистонга юборсак ёмон бўлмайди. Мана биттагина мисол. 2012 йилнинг 14 декабрида Қозоғистон президенти Нурсултон Назарбой ўз халқига “Қозоғистон -2050 Стратегияси” номли мактуб билан мурожаат қилар экан, жумладан шундай дейди: “Бизга кенг кўламли хусусийлаштиришнинг иккинчи тўлқини лозим. Бу осон иш бўлмайди, чунки давлат ва бозор ўртасида маъсулиятни қайтадан тақсимлаш керак бўлади. Иқтисодий ўсишнинг юксак тезлигини сақлаб қолиш учун шундай қилишга мажбурмиз. Хусусий сектор давлатдан кўра ҳар доим самаралироқдир. Шу сабабли, биз стратегик бўлмаган корхона ва хизматларни хусусий қўлларга беришимиз керак. Бу – хусусий тадбиркорликни ривожлантириш йўлидаги ўта муҳим қадамдир”.

Айтиш керакки, ҳозир Қозоғистонда 2014-2016 йилларга мўлжалланган Хусусийлаштириш Дастурини қабул қилиш учун иш олиб борилмоқда. Аммо, Ислом Карим бундай нарсаларни тушуниши учун юз йиллар керак.

Шу сабабли, Ислом Каримни АҚШга юбориш янада фойдалироқ бўлади. У мамлакатнинг президенти Барак Обамадан бир нарсаларни ўрганиш учун эмас, у ерда яшаётган “Бирлик” Партияси лидери Абдураҳим Пўлатдан ўрганиш учун юбориш керак. Чунки, айнан Абдураҳим Пўлат Ўзбекистон иқтисодида инқилобий ўзгаришлар қилиш шартлигини йиллардан бери гапириб келмоқда. Айнан у Ислом Каримнининг ақлини шок терапия усуллари билан бироз ишлайдиган ва хусусий сектор давлатдан кўра самаралийроқ эканлигини тушунадиган қилиб қўя олиш қобилиятига эга.