31 July 2014
21:43 - Тошкентда қирғиз дипломати спиртли ичимликларнинг ғайриқонуний савдосида айбланди
Қирғизистоннинг Ўзбекистондаги элчиси ўринбосари Қанатбек Шаршенбеков спиртли ичимликларнинг ғайриқонуний савдоси билан шуғулланганликда айбланмоқда. Икки ҳафта муқаддам ички ишлар ва прокуратура қошидаги Департамент ходимлари томонидан ўтказилган рейдлар чоғида Аюб Янва исмли киши ғайриқонуний иш устида қўлга олинган. У сўроқ пайтида ушбу молларни Тимур Алимовдан сотиб олганини айтган.

Ўз навбатида Тимур Алимов спиртли ичимликларни Қирғизистон элчихонаси ходими Қанатбек Шаршенбековдан олаётгани борасида кўрсатма берган. Дипломатик дахлсизлик мақомига эга бўлган элчихона ходимини жавобгарликка тортиш мақсадида тегишли тартибда нота берилган ва Бишкекка чақириб олинган дипломатнинг иши ўрганилмоқда.

Эслатиб ўтамиз, бир йил аввал Қанатбек Шаршенбеков Тошкентда ўзбек шифокорларини ҳақорат қилиш ва миллатчилик қилишда айблангани ҳақида “Ҳаракат” ҳам хабар берган эди.
« Олдинги хабар Хабарлар рўйхати Кейинги хабар »