22 June 2014
19:08 - Путин оғиздагина Петр Порошенконинг тинчлик режасини қабул қилди, амалда эмас. Натижа даҳшатли бўлади – Россия парчаланади, Ўзбекистон парчаланиш остонасига келади
Украина ва Россия хабар агантликларига кўра, Россия Президенти Владимир Путин Украинадаги ҳамкасби Петр Порошенконинг 20 июнь куни кечқурун эълон қилган мамлакат жанубидаги вазиятни барқарорлаштириш бўйича тинчлик режасини умуман олганда қабул қилди. Аммо, у қуйидаги сўзларни ҳам айтган: Украина ҳукумати қарши тарафга ультиматум қўйишини қабул қилиб бўлмайди.

Демак, Путин тинчлик режасини оғиздагини тан олиб, амалда эски сиёсатини, яъни Донбассдаги сепаратист-террористларни қўллаб-қувватлашни давом эттирмоқчи.

Украина ҳукумати, Путин истагандек, маҳаллий ҳокимиятни қурол билан тортиб олган ва расмий ҳокимиятни тан олмаётган кучлар билан ўзини тенглаштириб, бу кучлар билан музокара столига ўтириши мумкинми? Йўқ, Ҳеч бир давлат бундай қилмайди.

Порошенко қўлига қурол олган ноқонуний кучларга қуролни ташлаб тинч ҳаётга қайтишга, керак, бўлса, бу минтақадан чиқиб кетишга имкон бермоқчи. Табиий, оғир жиноят қилганларга бундай имконият ҳам берилмайди.

Путиннинг юқоридаги сўзлари сепаратист-террористларни руҳлантириши керак эди, айнан шундай бўлмоқда ҳам. Украина жанубида уруш каби қуролли тўқнашувлар давом этмоқда. Агар Россия ўз ҳарбий кучларни тўғридан-тўғри Украина жанубига олиб кирмаса, сепаратист-террористлар секин-аста йўқ қилинади.

Бу жараён қисқа вақтда битмайди. Чунки, ҳозир маълум бўлмоқдаки, Украинанинг армияси, Ички ишлар вазирлигига боғлиқ қуролли кучлар, хавфсизлик хизматларида руслар катта кучга эга бўлганлар, ҳозир улар ёки сепаратист-террористлар тарафига очиқча ўтиб кетмоқдалар ёки ичкарида туриб сепаратист-террористларга ёрдам бермоқдалар. Демак, ҳамма бу структуралар қайтадан шакллантирилиши лозим. Бу эса вақт талаб қилади.

Путиннинг боши Қримни босиб олганидан кейин учраган халқаро санкциялардан анча айланиб қолгани ҳам аниқ. Демак, катта эҳтимоллик билан айтиш мумкинки, Россия Украина жанубига армиясини олиб кирмайди, сепарист-террористларни ташқаридан туриб қўлла-қувватлашни давом эттиради.

Украина атрофида бўлаётган жараёнларнинг натижаси ҳам аниқ: Россия Федерацияси, худди СССР каби, парчаланиб кетади.

Дарвоқе, Украинанинг собиқ президентлари Кравчук, Кучма ва Юшченко бугун Путинга хат ёзиб, Порошенконинг режасини қабул қилишга чақиришди. Хат имзолангандан кейин ўтказилган матбуот конференциясида Виктор Юшченко Путиннинг сиёсатини фашистик деб баҳолади.

Россиянинг парчланиши минтақада жуда кўп муаммолар чиқаришини ҳам унутмаслик керак. Битта нарса аниқ – Ўзбекистоннинг аҳволи бундан ҳам ёмонлашади. Ақл билан иш кўрилмаса, Ўзбекистон ҳам парчаланади. Булар – келажак авлоднинг бошига тушадиган ишлар. Аммо, ҳозирги авлод, тўғрироғи, ҳозирги авлод сиёсатчилари тўғри ишлар қилишлари, тўғри фундаментлар қўйиб кетишлари лозим.
« Олдинги хабар Хабарлар рўйхати Кейинги хабар »