Ўзини “Россия-Узбекистан. Вести.uz” деб танитадиган, аммо фақат рус тилида ишлайдиган сайт қандайдир “16/12” телеканалига асосланиб, Россиянинг энг катта бойи, ўзбек аслли Алишер Усмонов Тошкентда Ўзбекистоннинг энг катта масжидини қурдираётганини билдиргани, аммо “Ҳаракат” агентлигининг мухбирлари буни шубҳа остига олганини 26 майдаги хабаримизда айтгандик. Бу хабарни фақат шубҳа остига олиш билан чекланмасдан, “ҳозир Алишер Усмонов Ўзбекистонда ҳеч нарса қилмайди” деган фикрни очиқлаган эдик.

Ҳозир маълум бўлишича, Алишер Усмоновнинг ўзи бу ишга алоқаси йўқлигини эълон қилибди, аммо, керак бўлса, ҳар қандай ёрдамга тайёр эканлигини билдирибди.

Минор қабристони олдида қурилаётган ўртамиён бу мачит Президент Ислом Каримнинг фармони билан қурилаётган эмиш. Агар шундай бўлса, яъни Ислом динининг биринчи душмани бўлган кишининг фармони билан мачит қурилаётган бўлса, бу факт - Ўзбекистонда ҳамма нарса махарабозлик ичида қолганинининг яна бир исботидир.