Ютганга ўхшайди дейишимизнинг сабаби – бу ҳақда хабар берган АҚШнинг машҳур Wall Street Journal газетаси кечаги сонида президент сайловларининг ниҳоий бўлмаган натижаларига кўра, Абдулла Абдуллоҳ биринчи турда 44,9 фоиз овоз билан ғалаба қозондиганини билдирди, иккинчи ўринда – 31,5 фоиз овоз билан афғонистонлик ўзбекларнинг лидери Абдурашид Дўстим томонидан ҳам қўллаб-қувватланган Ашраф Ғани, учинчи ўринда – ҳозирги президент Ҳамид Карзайнинг одами деб ҳисобланадиган Залмай Расул.

Кўринишидан, ниҳоий натижалар ҳам айнан шундай бўлади ва биринчи икки ўринни олган Абдулла Абдуллоҳ ва Ашраф Ғани июнь ойида иккинчи тур сайловларида беллашишади.

Wall Street Journal газетасининг мухбири бир қатор афғонистонлик сиёсатшуносларга асосланиб, иккинчи турда ҳам Абдулло Абдуллоҳ ғалаба қозонишини айтар экан, яна ўша сиёсатшуносларнинг “Ашраф Ғани ўз номзодини иккингчи турга қўймасдан, Абдулло Абдуллоҳ президент бўлишига йўл очиши кераклиги” ҳақидаги фикрларини ёзади.

Бундан аввалги сайловларда Ҳамид Карзай билан иккинчи турга чиққан Абдулла Абдуллоҳ шундай қилган экан. Ўшанда биринчи турда Ҳамид Карзай 49,7 фоиз, Абдулла Абдуллоҳ 30,1 фоиз овоз олгани ҳам эслатилади.

Афғонлар урушдан чарчашган, уларга иккинчи тур сайловлари ҳам ортиқча юк бўлса керак. Иккинчи турнинг бўлиб-бўлмаслиги эса Ашраф Ғанига боғлиқ бўлиб қолмоқда, дейди мухбиримиз.