13 May 2014
16:31 - Қозоғистонда 20 та вертолёт чиқарилди
Казинформ агентлигининг бу ҳақдаги хабарида “ишлаб чиқарилди” эмас, айнан, “чиқарилди” сўзи ишлатилган. Хабарнинг ўзидан маълум бўладики, 20 та ЕС-145 вертолёти бу ерда йиғилган, холос.

Бу вертолётлар 2010 йили “Казахстан инжиниринг” номли Қозоғистон компанияси ва "Airbus Helicopters" номли Франция-Германия компанияси биргаликда тузган “Еврокоптер Казахстан инжиниринг” компаниясининг Остонадаги заводида йиғилган. Ўша йили қабул қилинган дастурга кўра, Остонадаги заводда ЕС-145 вертолёти EC-145 йиғилади, бўялади, жиҳозланади, ўрнатилган жиҳозлар тест қилинади, вертолётнинг ўзи ерда ва осмонда синовлардан ўтказилади.

Хабарда айтилишича, бу вертолёт тезкор тиббий ёрдам, қутқариш ишлари, полиция ва чегара назорати учун энг қулай восита. Бундан ташқари, у дунёнинг энг хавсиз вертолётларидан бири ҳисобланар экан.

Қозоғистонда биринчи 2 та вертолёт чиқарилгани ҳақида 2011 йилда биз ҳам хабар берган эдик.
« Олдинги хабар Хабарлар рўйхати Кейинги хабар »