Бугун Қозоғистоннинг давлат ахборот агентлиги Казинформ тарқатган хабарнинг сарлавҳаси шундай: “Қозоғистон президенти кичик ва ўрта бизнеснинг ривожланиш темпидан ва мамлакат иқтисодига инвестицияларнинг камайишидан норози”.

Хабарда айтилишича, бугун Нурсултон Назарбой айнан шу масалани муҳокам қилиш учун Остонадаги Оқўрда қароргоҳида Миллий Инвесторлар Кенгашининг (шунақаси ҳам бор экан – “Ҳаракат”) мажлисини ўтказибди. Мажлисда давлат органларининг раҳбарлари, миллий ширкатлар, Миллий Тадбиркорлар Палатаси ва бизнес жамиятининг вакиллари иштирок этиб, мамлакатда бизнес ва инвестицияларни ривожлантириш учун нималар қилиш кераклигини маслаҳатлашишибди.

Нурсултон Назарбой ва мажлиснинг бошқа қатнашчилари Қозоғистоннинг иқтисодига оид келтирган ўнлаб рақамлари, хусусан, яхши кетмаётган соҳалардаги рақамларни кўриб оғзингиз очилиб қолади, дейди мухбиримиз. Чунки, бу рақамлар мажлисда ҳақиқий аҳвол муҳокама қилинаётганини, мақсад яхши рақамларнигина келтириб халқни алдаш эмас, камчиликларни тузатиш ва олға кетиш эканлигини кўрасиз.

У рақамларни қўйиб туринг, Нурсултон Назарбойнинг шу сўзларига эътибор беринг: “Ҳукумат ва Палатанинг бу соҳалардаги фаолияти Жаҳон Банкининг “Бизнес юритиш” рейтинги доирасида баҳоланади. 2016 йилгача шу рейтинг бўйича тузилган жаҳон рўйхатида биринчи 30 таликка киришни олдимиздаги вазифа сифатида белгилайман.”

Кўриб турибсизки, Нурсултон Назарбой Президент сифатида ўз вазифасини бажармоқда.

Эй, ўзбеклар!

Бизнинг Ислом Карим қаерда? У Нурсултон Назарбой кўтарётгани каби масалаларни тушунадими бу одам? Нурсултон Назарбой каби улуғ вазифалар қўйишга кучи етадими?

Нега Ўзбекистон иқтисоди ўлаётгани, тўғрироғи, иқтисодимизнинг қуввати бўйича 2005 йилда қозоқлардан 5,5 баравар орқада бўлсак, ҳозир 8 баравар орқада қолаётганимиз, Қозоғистонда ўртача ойлик 700 доллар атрофида экан, нима учун бизда 90 доллардан ҳам камлиги, Ўзбекистондек давлатнинг бюджети чет элларда ишлаётган ўзбек мардикорлари юбораётган пул билан оёқда турганлиги, яъни Ўзбекистон мустақил давлат сифатини йўқотаётгани ҳеч кимни қизиқтирмайди?

Нимага бу аҳволдан чиқиш учун нималар қилиш кераклиги ҳеч қаерда муҳокама қилинмайди, нима учун бу масалалар устида “Бирлик” Партияси ва “Ҳаракат” Агентлигидан бошқа ҳеч ким ўйламайди?

Эй, ўзбеклар, сизни шу саволлар қизиқтирадими ўзи?

Шу пайтгача қизиқтирмаётган бўлса, энди қизиқтирсин. Акс ҳолда ўзбеклар миллат эмас, қозоқларга мардикорлик қиладиган подага айланиб бораверади. Ҳар бир ақли ишайдиган ўзбек ўйлаши керак – Ўзбекистондаги мавжуд режим ҳеч нарсага қодир эмаслигини кўрсатиб бўлди, кўриниб турибдики, мухолифатчиликка даво қилаётган турли гуруҳлар ҳам масхарабозликдан нарига ўтишаётгани йўқ, ўтишолмайди ҳам.

Демак, миллат сифатини йўқотаётган ўзбекларни қайтадан миллат қилиш, давлат сифатини йўқотаётган Ўзбекистонни ҳақиқий давлатга айлантиришни истаганларнинг аҳволимизга тўғри диагноз қўйган ва бу аҳволдан чиқиш йўлларини кўрсатаётган “Бирлик” атрофида бирлашишдан бошқа йўллари йўқ. “Бирлик”дан одам сотиб олиш билан шуғулланаётган ҳаромий мухолифатчи гуруҳлар ва “Бирлик”ни парчалашга интилаётган миллат хоинларини йўқ қилишдан бошқа йўл йўқ. Чунки, бу кураш – ўзбеклар ва Ўзбекистон учун ҳаёт-мамот жангидир.