Интернет ёмон нарса. Унда шундай нарсаларни топиш мумкинки, ҳамма тарафидан тан олинган стереотиплар бир пастда чилпарчин бўлади. Масалан, АҚШ энг ривожланган, Африка эса ривожланиш даражаси энг паст жой ҳисобланарди.

Аммо, русларнинг Mobile Device cайтида айтилишича, аҳолиси тахминан 1 миллиард бўлган Африка давлатларида 650 млн мобиль телефон абоненти бор экан. Бу рақам охирги 10 йил ичида 40 баравар ортибди. Демак, ҳозир Африкада киши бошига тахминан 0,65 тадан мобиль телефон тўғри келади.

Ўзбекистонда аҳвол қандай? Мамлакатимиз парламенти қуйи палатасининг Халқаро ва парламентлараро аллоқалар комитетидаги ўтказилган мажлисда тилга олинишича, Ўзбекистонда мобиль алоқа абонентларининг сони 19,6 млн бўлибди. Бизда аҳолининг сони 30 миллионга чиққанини назарга олсак, бу соҳада Африкадан ёки бир оз ошибмиз, ёки тенглашибмиз. Дўппимизни осмонга отиб, чапак чалишимиз керакмасми?

Минг афсуски, йўқ. Африка жаҳоннинг энг қашшоқ минтақаси ҳисобланади ва кўриниб турибдики, ривожланиш ёки қашшоқлик даражасини белгилаш учун мобиль алоқа абонентларининг сонини ҳисобга олишда эҳтиёт бўлиш керак. Бугун мобиль алоқа абонентларининг сони бойлик эмас, кўпроқ қашшоқлик даражасини кўрсатар экан.

Бундан чиқдики, “Ҳаракат” Агентлигининг “Ўзбеклар ош ейиш ва туалетга боришдан бошқа нарса билан қизиқмайдилар” деб ёзавериши хато. Энди бошқача ёзишимиз керак: “Ўзбеклар ош ейиш, мобил телефонли бўлиш ва туалетга боришдан бошқа нарса билан қизиқмайдилар."