Сайлов 25 майда бўлади. Ҳозир номзодлар кўрсатиш даври. Кечагача 13 номзод ҳужжатларини Марказий Сайлов Комиссиясига топширгани Украина ахборот воситалари томонидан билдирилди. Уларнинг ичида диққатга сазоворлари қуйидагилар: Петр Порошенко, Юлия Тимошенко, Сергей Тигипко, Михаил Добкин.

Бу исмларнигина тилга олганимизнинг сабаби – шу кунларда ўтказилаган сўровномаларга кўра, сайловга борадиганлар орасида энг кўп овоз олиши мумкин бўлган 4 сиёсатчи қуйидагилар:

Петр Порошенко - 36,2%

Виталий Кличко - 12,9%

Юлия Тимошенко - 12,0%

Сергей Тигипко - 10,0%

Михаил Добкин - 5,3%

Аммо, бу рўйхатдаги “Удар” Партиясининг раиси Виталий Кличко ўз номзодини кўрсатгани йўқ ва кўрсатмоқчи эмас, у демократлар Петр Порошенкони умумий номзод қилиб кўрсатишлари кераклигини гапиради ва шу йўналишда курашмоқчи. Петр Порошенко Виктор Юшченко президентлик қилганда ҳам, Виктор Янукович даврида ҳам вазир бўлган одам, Украинанинг 5-чи сонли миллиардери.

Юлия Тимошенко зарғалдоқчиларнинг лидерларидан бири сифатида танилган, Виктор Юшченко президентлик қилганда, у Бош вазир бўлган. Аммо, зағалдоқчиларнинг парчаланишида айнан Юлия Тимошенконинг айби энг катта, у Виктор Юшченко устидан ғалаба қозониш учун Россия президенти Владимир Путиннинг пинжига кириб кетишга ҳам рози бўлган сиёсатчи. Сергей Тигипко Виктор Януковичнинг Регионлар Партиясида раис ўринбосари ҳам бўлган, аммо ҳозир мустақил номзод сифатида президентлик курсиси учун курашмоқчи. Михаил Добкин Ҳарьков вилоятининг собиқ ҳокими, ҳозир Россия билан келишиб, Қримни қайтариб олиш позициясини ҳимоя қилаётган номзод, у Регионлар Партиясининг номзоди сифатида сайловда қатнашмоқда.

Дарвоқе, Регионлар партияси кечаги қурултойида президентика номзод қилиб Михаил Добкинни кўрсатиш билан бир қаторда, аввалги партия лидери, аввалги президент Виктор Чнуковични партияда чиқариб ташлади.

Украинада аҳвол жуда мураккаб, дейди мухбиримиз. Аммо, Петр Порошенко президент бўлса, украинлар учун энг яхши вариант бўлган бўларди. Айнан шундай бўлишининг эҳтимоллиги катта.

Расмда – Петр Порошенко.