АҚШ ва Европа Иттифоқи Қримни босиб олган Россияга қарши санкцияларни орттирмоқдалар. Ғарб ва Россия ўртасидаги алоқалар минимал даражага туширилгандан ташқари Россия G8 ташкилотидан феълан чиқариб бўлинди. Бир қатор Россия амалдорлари ва Путинга якин бўлган ўғри-бизнесменларга АҚШ ва ЕИ мамлакатларига кириш тақиқланди, уларнинг бу мамлакатлардаги активлари музлатилди ва ҳакозалар.

Бунга жавобан баъзи АҚШ расмийларига Россияга кириш таъқиқланиши кулгидан бошқа нарсага арзимайди. Қримни босиб олган рус кучлари қримтатарларининг миллий лидери Мустафа Жамилўғлини Қримга киритмаётганлари эса, кулгидан ташқари, Россиянинг ўзига бумеранг каби уриладиган воқеадир.

Мустафа Жамилўғлини Қримга киритмаётганлари ҳақида унинг ўзи хабар берди. Украиналарнинг УНИАН агантлиги тарқатган хабарга кўра, бугун Мустафа Жамилўғли Украина кризис медиа-марказида ўтказган матбуот конференциясида Қримни босиб олган рус қўшинлари ўзини Қримга киритишмаётганини айтди.

“Мени у ерга киритишмаса нима қилишим - босқинчи ҳокимият учун сир ва сюрприз бўлсин. Уларга тайёрланиш учун имкон бермайлик”, дебди у.

У қримтатарлари Қримни тарк этмаётганлари ва этмасликларини ҳам урғулаган. Хабарларда Мустафа аканинг бу хусусдаги қуйидаги сўзлари келтирилади: “Ҳозир болалар, аёллар ва қарияларни Украинанинг қитъа қисмига, уларнинг хавфсизлилини таъминлаш учун жўнатмоқдалар. Эркаклар жойида қолмоқда. Қримда қочиш тенденцияси йўқ. Умид қиламанки, бўлмайди ҳам. Бизнинг ўз юртимизга қайтиш учун 50 йил йил курашимиз, кейинчалик у ердан кетиш учун бўлмаган.”

БМТнинг расмий маълумотларига кўра, 9-17 март орасида Қримдан Херсон вилоятига тахминан 1 минг киши ўтган, уларнинг мутлақо кўпчилиги қримтатаралри. Табиий, бу катта рақам эмас.