16 March 2014
09:36 - Яна бир Бируний номли университет очилди, ўзбекларга нима?
Бу Университетнинг асосчиси нима учун унга Бируний номи берилганини шундай изоҳлайди:

“Ер ўз ўқи атрофида айланиши билан бирга қуёш атрофида ҳам айланишини Коперник ва Галилейдан 500 йил аввал, Ернинг тортиш кучини Ньютондан 700 йил аввал изоҳлаган, саноқсиз кашфиётлари билан ўз замонидан анча олдинга ўтиб кетган Абу Райхон Бируний - Университетимизнинг илҳом ўчоғи бўлади.”

Университетнинг асосчиси ким дейсизми? У туркиялик таниқли профессор Аднан Юксал. Университет қаерда очилмоқда дейсизми? Истанбулда очилмоқда. У кўпроқ медицина олий ўқув юртига ўхшаб кетади.

Туркияда университетларнинг сони 200 га, Истанбулда эса 50 га яқинлашиб келаётганини ёзган “Миллиёт” газетаси, университетлар сони бўйича Туркия АҚШдан ҳали анча орқада эканлигини урғулашни унутмайди. Аммо, Абу Райхон Бируний ўзбек олими эканлигини, эрамизнинг биринчи ва иккинчи минг йилликлари чегарасида яшаганини айтишни эсдан чиқариб қўяди.

Майли, нима ҳам дердик. Муҳим бўлгани, бу олимнинг борлигини инкор этиб бўлмаслиги, Тошкентдан кейин Истанбулда ҳам унинг номи билан аталган университетнинг бор бўлиши.

Балки, бундан ҳам муҳими, Абу Райхон Бирунийнинг авлодлари мардикорлар подасига айланиб бораётганлари сабабли бўлса керак, "Биз билан нима бўлаяпти ўзи?" деган савол устида ҳам ўйламаётганлари.

Балки, тўғридир. Ўйлашнинг нима кераги бор? “Бирлик” бор, “Ҳаракат” бор, улар ўйласин.
« Олдинги хабар Хабарлар рўйхати Кейинги хабар »