16 March 2014
02:54 - Ниҳоят қримтатарлари Қримда руслар тарафидан ўтказиладиган референдум бўйича расмий қарорларини очиқладилар
Кеча Қримтатар Халқ Мажлиси қримтатар халқи номидан Украина Олий Радаси ва Украина халқига – ҳамма миллатларга мансуб бўлган Украина фуқароларига Мурожаат қабул қилди.

Мурожаатда Қримдаги вазият, қримтатарларнинг тарихи, куч ишлатмаслик принциплари, БМТнинг 2007 йил 13 сентябрда қабул қилинган “Ерли халқларнинг ҳуқуқлари” Декларацияси ва 1991 йил 28 июнда қабул қилинган Қримтатар халқининг миллий суверенитети Декларациясига асосланиб, Украинанинг ҳозирги чегаралар ичидаги мустақиллиги тан олинади, Россиянинг агрессияси ва Қримни босиб олиш режалари кескин равишда қораланади, 16 мартда Қримда бўладиган референдум тан олинмаслиги эълон қилинади.

Айни замонда, қримтатар халқи қайси мамлакатда яшашини ўзи ҳал қилиши кераклиги урғуланади ва Олий Рада ҳамда Украинанинг бошқа олий давлат органларидан БМТ, ЕХҲТ, Европа Кенгаши, Европа Иттифоқи билан биргаликда қримтатар халқининг ўз тарихий ҳудудларида ўз тақдирини ўзи белгилаш ҳуқуқи таъминлашини сўрайди.

Мурожаат Қримтатар Халқ Мажлисининг раиси Рефат Чубаров тарафидан 15 март куни имзоланган.

Айни замонда Рефат Чубаров Ислом Ҳамкорлик Ташкилотининг Бош котиби Ияд Бин Амин Маданийга ҳам мурожаат қилиб, бир марта геноцидга учраган қримтатр халқининг бошига тушаётган ҳозирги муаммоларни тинч йўл билан ҳал этиш ишларига аралашишни сўрайди.

Рефат Чубаров турли сиёсий шарҳларида 16 мартда Қримда бўладиган референдумни қуролли аскарлар соясида ўтказиладиган клоунада ва цирк деб ҳам баҳолади.

Қримтатар Халқ Мажлисининг собиқ раиси, қримтатар халқининг миллий лидери Мусиафа Жамилўғли матбуотга берган интервьюларида Владимир Путиннинг сиёсатини қоралади, ундан ҳеч қандай умиди йўқлигини гапирди ва нима бўлишига қарамасдан қримтатарларини ҳеч ким она юртларидан ҳайдаб чиқаролмаслигини урғулади.

Бу маълумотлар Қримтатар Халқ Мажлисининг расмий сайтидан олинган - qtmm.org
« Олдинги хабар Хабарлар рўйхати Кейинги хабар »