Бугун Москвада 2 та рухсат берилган намойиш ўтказилди. Улардан бири - Путиннинг Қрим масаласидаги агрессив сиёсати тарафдорларинки бўлса, иккинчиси – Қрим муаммосини тинч йўллар билан ҳал этиш тарафдорлариники эди.

Қрим масаласига Россия ҳарбий куч билан аралашмаслиги керак деб ҳисоблайдиганларнинг “Тинчлик марши” номли намойишида, Москва полициясининг расмий хабарига кўра, 3 минг атрофида одам қатнашган. Улар Пушкин майдонидан Сахаров проспектигача юриш қилишди.

Путин тарафдорларининг “Дўстлик марши” деб аталган намойишига эса, яна ўша Москва полициясининг расмий хабарига кўра, 15 минг атрофида одам қатнашган.

Ҳа, Путин тарафдорлари, унинг қўлидаги полиция айтган рақамларга ишонсак, Путинга қарши бўлганлардан 5 баравар кўп. Аммо, Путиннинг қўлида бўлган Россиянинг асосий хабар воситалари, хусусан, бутун телевидение, руслар гўёки якдиллик билан Путиннинг сиёсатини қўллаб-қувватлаётганини кўрсатиш билан овора булган пайтда, Путинга қаршиларнинг сони етарлича катта эканлигини тан олиш керак.

Аввал ҳам урғулаганимиздек, Россиянинг демократик мухолифати саросимда ва асосан сустлик сақламоқда. Тахмин қилиш қийин эмаски, бу сустлик секин-аста бузилади ва Путиннинг Қрим сиёсатига қарши кучли ҳаракатлар бошланади.

Қримда эса эртага бўладиган референдумга охирги тайёргарликлар давом этмоқда. Россиянинг ва Қримдаги русларнинг қўлида бўлган ахборот воситалари референдумни кузатиш учун жуда кўп чет эллик кузатувчилар келишганини, улар ичида ҳатто америкаликлар борлигини айтиш билан овора.

Ғарб эса, референдумнинг қонунсиз эканлигини такрорлар экан, Украина Олий Радаси Қрим парламентининг рефрендум ўтказиш қарорини бекор қилди ва кеча Қрим парламентини тарқатиб юбориш ҳақида ўз қарорини ҳам чиқарди.