Бухоро вилояти Қоровулбозор тумани прокурори Жаҳонгир Ҳотамовнинг Ўзбекистон Бош прокуратурасига оид “Ҳуқуқ” газетасида чоп қилинган мақоласида туманда истиқомат қилувчи А. Сафарова исмли аёл ирим-сирим йўллари билан касал неварасини тузатаман деган ҳаёл билан болакайнинг ҳаётига зомин бўлгани таъкидланади. Прокурорга кўра, невараси касал бўлган буви уни шифокорга кўрсатиш ўрнига чақалоқнинг энса қисмини лезвияда кесиб, қон чиқарган. “Ҳаром қон” оқса, невараси тузалишини ўйлаган Сафарова чақалоқнинг аҳволи оғирлашганига қарамай шифокорга мурожаат қилмаган.

Сўнгра оғир аҳволда шифохонага келтирилган чақалоқ қон кетиши ва ўткир полиорган етишмовчилиги оқибатида нобуд бўлган. Фуқаро А.Сафарова эса Ўзбекистон Республикаси ЖКнинг 102-моддаси (Эҳтиётсизлик орқасидан одам ўлдириш) билан жавобгарликка тортилган.