23 February 2014
01:43 - Украинада ҳокимият мухолифатнинг қўлига тўла ўтди, Путин тамом бўлди
Тўғри, Россия Президенти Владимир Путининг Россия ва ўзининг обрўсини сақлаб қолиш учун биттагина йўли бор – Сочидаги Олимпиада бекилиши билан Украинани босиб олиб, Виктор Януковичнинг ҳокимиятини тиклаш. Аммо, у энди бундай қадамга журъат қилолмаса керак.

Хўш, Украинада нима бўлаяпти?

Виктор Янукович бўлаётган воқеаларни давлат тўнтариши деб баҳолаб, ўз лавозимидан кетиш нияти йўқлигини билдирган бўлишига қарамасдан, Олий Рада кеча кечқурун шу йил 25 майга президентлик сайлови тайинлади. Демак, Януковични унинг партиясидан сайланган депутатлар ҳам ағдарилган президент деб ҳисоблашмоқда.

Касаллиги учун қамоқ муддатини Харьковдаги касалхонада ўтказаётган Юлия Тимошенко у ердан қўйиб юборилди, Киевга учиб келиб, Мустақиллик Майдонида инвалидлар коляскасида ўтириб нутқ ҳам сўзлади. У намойишчиларни тарқалмасликка чақирди, бу ерга Янукевич ва унинг яқин одамларини олиб келиш кераклигини гапирди. Бу унинг хатоси, уларни фақат инквизиция замонидаги каби майдоннинг ўзида ўлдириш учунгина олиб келинадими? Ҳа, улар суд ҳукми орқали ўз жазоларини олишлари керак, аммо Майдонда эмас.

Парламентнинг собиқ раиси ва унинг биринчи ўринбосари Россияга қочишгани маълум бўлди. Янукович ҳам Донецкдан хусусий самолётда учиб кетмоқчи экан, чегарачилар уни қўйишмабди. Табиий, у ҳам Россияга қочиш ниятида бўлган. Харьков вилоят ҳокими ва шаҳар мари ҳам Россияга қочишибди.

Юлия Тимошенко 25 майдаги президент сайловларида иштирок этишини билдирди, Украина тезда ЕИга кириши кераклигини урғулади. Балки, у президент сайловларини ютади ҳам, аммо ҳозир кучга кирган 2004 йил Конституциясига кўра, янги президентнинг ваколатлари катта бўлмайди. Юлия Тимошенкони ўша курсига ўтказиш – уни нейтраллаштиришнинг энг яхши йўлидир. Ҳукумат ва парламент раҳбарлигига тажрибали, аммо, Тимошенкодан фарқли ўлароқ, принципли одамлар келтирилиши керак.

Шундай қилинсагина, Украина ҳозирги ўта оғир аҳволдан Ғарбнинг ёрдами билан чиқолади. Аксинча, ишлар чатоқ бўлади.
« Олдинги хабар Хабарлар рўйхати Кейинги хабар »