Бундан олдинги хабаримизда “Украинада жараёнлар яшин тезлигида ривожланмоқда: Урушгами ёки мухолифатнинг ғалабасига?” деб савол қўйгандик. Мутлақо кўпчлик воқелар мухолифатнинг ғалабаси яқинлашаётганидан дарак бераётган бўлса, эҳтиёт бўлгандик. Асосий қўрқув Россиянинг бу ишларга аралашиши, ҳатто ҳарбий куч ишлатиши мумкинлигидан келиб чиқарди.

Аммо, ўтган бир неча соат ҳамма нарсани равшан қилди дейиш мумкин. Пладимир Путин Сочидаги Олимпиада ўйинлари бекилмагунча Украинадан узоқ туришга қарор қилган, эртага ҳамма нарса ўзгариши мумкин деген тахминни назарга олмасак, Украинада мухолифат тўла ғалаба остонасига келганини баралла айтишимиз керак.

Бу мамлакатда жараёнлар охирги 3-4 соат ичида қуйидагича ривожланди.

Олий Рада аввал келишувларга мувофиқ сентябрь ойини ҳам кутиб ўтирмасдан, Президентнинг ваколатлари анча чекланган 2004 йил Конституциясини кучга киритди, халқаро мажбуриятларни бажариш кекраклигига асосланиб, Юлия Тимошенкони қамоқдан озод қилди, Ички ишлар вазири вазифасини вақтинча бажаришни Юлия Тимошенконинг одами Арсен Аваковга топширди. Януковичнинг югурдаги бўлган Бош прокурор Виктор Пшонкани лавозимидан олди.

Янги ички ишлар вазири дарҳол ҳуқуқ-тартибот органлари халқ томонига ўтганини эълон қилди. Мудофаа вазири Павел Лебедев эса ўз вазифасини ҳеч кимга топширмасдан Кримга учиб кетгани, тўғрироғи, қочиб кетгани айтилмоқда.

Ҳамма энди Юлия Тимошенконинг дарҳол қамоқдан чиқарилишини ва Виктор Януковичнинг истеъфо аризаси очиқланишини кутмоқда. Жорийдаги ҳукумат ваколатларини янги тайинланадиган ҳукуматга топширишга тайёр эканлигини эълон қилди.

Харьковда Украинанинг жанубий-шарқий минтақалари ва Кримдан келган ҳамма даражадаги тахминан 3,5 минг депутатнинг иштирокидаги қурултой тартибсизликларга йўл қўймаслик, қуролланган дружиналар тузиш каби умуий гаплардан нарига ўтмаяпти. Ким билади, бу қурултой ҳам Сочида Олимпида ўйинларинг бугун бекилишини ва ундан кейин бўлиши мумкин бўлган Путиннинг қарорларини кутмоқдами?

Бу саволга жавоб йўқ эди, чунки, Янукович ҳам ҳеч қаерда кўринмаяптанди. Аммо, ҳозиргина унинг маслаҳатчиси Анна Герман Януковичнинг баҳнотини тарқатди. Янукович Украинада эканлигини, давлат тўнтариши бўлганига қарамасдан ўз лавозимида қолишини билдирибди. Демак, у ҳам Путиннинг қарорини кутади.

Фикримизча, энди Путин ҳеч нарса қилишга журъат этолмаса керак. Унинг Украина ишларига ҳар қандай шаклда аралашиши катта талофатларга йўл очишдан ташқари, Россиянинг Ғарб билан қарама-қаршилигини жуда катта ўлчовда орттиради.