19 January 2014
22:40 - Украина мухолифати ҳокимиятни қўлга олмоқчи
Бугун Киевнинг марказидаги Мустақиллик Майдонида (уни Евромайдон ҳам дейиш одат тусига кирмоқда) мухолифат Халқ Йиғилиши деб аталган оммавий митингларнинг 8-чисини ўтказди. Милиция 10 минг киши йиғилганини айтса, мухолифатчилар 100 минг одам тўпланганини айтишмоқда. Расмга қараганда, мухолифатчиларнинг гапи ҳақиқатга яқинроқ.

Украина Президенти Виктор Янукович 17 январь куни намойишчиларга қарши репрессияларни кучайтиришга мўлжалланган бир қатор қонунларни яшин тезлигида имзолагандан кейин, мухолифат ҳам жиддий ва кескин қадамлар қилишга бошлади. Бугунги Халқ Йиғилишида қабул қилинган қарорлар шулар жумласидандир.

Митингчилар тарафидан қабул қилинган қарор қуйидагича:

- Халқ депутатларидан иборат бўлган Халқ Радаси тузиш;
- Халқ Радаси Украина халқи томонидан тасдиқланиши ва қонуний мақомга эга бўлишига эришиш;
- Янги Конституция қабул қилиш.

Маълумки, Украинанинг парламенти Олий Рададир. Кўринишидан мухолифат Халқ Радаси номи остида янги парламент яратиб, ҳокимиятни шу йўл билан қўлга олмоқчи. Украина халқи бу ғояни қанчалик қўллаб-қувватлаши номаълум. Нима бўлганда ҳам, бу каби қадам Украинада икки ҳокимиятчиликка ва келажакда фуқаролар урушига йўл очиши мумкин.

Шу соатларда Евромайдондаги митингчилар билан уларни тарқатиб юбориш учун сувотар қуроллар ишлатаётган милиция гуруҳлари ўртасида катта тўқнашувлар бўлмоқда. 20 милиционер яраланиб, касалхонага ётқизилгани айтилмоқда. Бугун кечаси Киева ва бутун Украинада жиддий воқеалар бўлиши мумкин. Мухолифатчилар Евромайдон милиция тарафидан штурм қилиниши мумкинлигини ҳам гапиришмоқда.
« Олдинги хабар Хабарлар рўйхати Кейинги хабар »