23 April 2013
01:17 - МДҲ давлатлари фуқаролари 2015 йилдан Россияга фақат чет эл паспорти билан кироладилар, ўзбекларга фарқи йўқ
Собиқ Совет республикаларидан Россияга келаётганларни фақат чет эл паспорти билан киритиш кераклиги ҳақида йиллардан бери гап боради. Мақсад - биринчи навбатда Марказий Осиёдан келаётган меҳнат муҳожирларининг йўлини тўсиш. Чунки, Марказий Осиёдан келаётган арзон иш кучи россияликларнинг ўзи учун меҳнат бозори имкониятларини камайтирмоқда.

Бу мамлакатнинг Бош вазир ўринбосари, миллатчилиги билан танилган Дмитрий Рогозин 2014 йилданоқ шундай тартиб киритиш тарафдори. Аммо, бир неча кун аввал Россия Президенти Владимир Путин бу ишни бунчалик тез бажариб бўлмаслигини, баъзи мамлакатларда ўз фуқароларини чет эл паспорти билан  таъминлаш иши ҳали йўлга қўйилмаганини ҳисобга олиб, 2015 йилдан бундай тартибга ўтиш лозимлигини гапирди. Амалда айнан шунда қилинса керак.

Кеча шу масала бўйича гапирган Россия Федерал Божхона Хизмати раҳбари Андрей Бельянинов Қирғизистон учун Россиянинг ўзи чет эл паспортлари тайёрлаб бериш ниятида эканлигини айтди. Шундай қилсак, Россияга Қирғизистондан қанча одам келаётганини ҳам назорат қилиш имкониятимиз бўлади, дебди у.

Маълумки, Ўзбекистонда ягона паспорт системаси аллақачон киритилган, демак, бизнинг мардикорлар учун Россияга бориш йўлида янги тўсиқ бўлмайди. Ўзбекистон ҳукумати миллионлаб ўзбек мардикорларининг аҳволини яхшилаш билан шуғулланса мақсадга мувофиқ бўларди. Маълумки, "Бирлик" Партияси Президент Ислом Каримга мурожаат қилиб, зудлик билан чет элда яшаётган ёки ишлаётган ўзбекистонликларнинг муаммолари билан шуғулланадиган вазирлик тузишни таклиф қилди. Аммо, асосан ўз соғлиғи билан овора бўлган Ислом Каримнинг бундай "майда-чуйда" масалалар билан шуғулланишга вақти ҳам йўқ. Бу - миллатга нисбатан қилинаётган жиноятдир.
« Олдинги хабар Хабарлар рўйхати Кейинги хабар »