17 January 2013
23:27 - Москвада отиб ўлдирилган Дед Ҳасаннинг миллати курд эканлиги, воқеага бошқача ранг бермоқда
Кеча Москванинг марказидаги ресторанлардан биридан чиқаётган пайтида қаршидаги уйнинг томида ўтирган снайпер тарафидан отиб ўлдирилган қонундаги ўғри (русча – вор в законе) Дед Хасаннинг миллати курд эканлиги, бу воқеага бутунлай бошқача ёндошиш кераклигини кўрсатмоқда. Асл исми Аслан ёки Ҳасан Раши́дович Усоян бўлган бу одам Россиянинг энг таниқли криминал авторитетларидан бири бўлиб, Италияда чиқадиган обрўли Corriere della Sera газетасининг тахминига кўра, Туркияга қарши ростакам уруш олиб бораётган Курдистон Ишчи Партияси жангариларини қурол билан таъминлаб келган.

Бир неча кун аввал Парижда шу партиянинг асосчиларида бири бўлган Сокина Жонсиз яна икки партия фаоли билан биргаликда отиб ўлдирилгани хабар қилинганди. Бу икки воқеанининг орасида боғланиш бўлмаслиги мумкин эмас, дейди мухбиримиз.

Бу воқеаларнинг яна бир томони бор. Маълумки, аввал СССР, кейин Россия очиқча бўлмаса ҳам, курдларининг террористик фаолиятини қўллаб-қувватлаб келган. Курдларга қуролни Россиянинг ўзи Дед Хасанга ўхшаганлар воситасида бериб турган бўлса керак. 1998 йили Туркиянинг уруш очиш таҳдиди остида Сурия Курдистон Ишчи Партиясининг раҳбари Абдулла Ожаланни ўз ҳудудларидан чиқариб юборганида, у аввал Россияга келганди. Туркия буни билиб қолиб, тўполан кўтарганидан кейингина, Россия ҳам уни ўз ҳудудларидан чиқариб юборган. У Италия орқали Африкага қочаётганда, гап-сўзларга қарганда, АҚШ ва Исроил разведкалари, уни Туркия тутиб беришган.

Буларнинг ҳаммасини назарга олиб, тахмин қилиш мумкинки, Дед Хасан шу пайтгача рус хавфсизлик хизматларининг ҳимояси остида ҳам яшаган. Ҳозир Туркия-Россия алоқалари, айниқса, Суриядаги воқеалар туфайли. ёмонлашиб бормоқда. Россия буни истамаслиги табиий. Демак, яна тахмин қилиш мумкинки, Дед Хасанни русларнинг ўзи ёки турклар билан ҳамкорликда йўқ қилишган.
« Олдинги хабар Хабарлар рўйхати Кейинги хабар »