Журнал Ҳаракат №1 (40) 2003. Дин ва сиёсат
Зафар Олимов - Индонезиянинг бугуни Ўзбекистоннинг эртасими?
«Вашингтон Пост» газетасининг 2002 йил 4 май сонида бир карашда Ўзбекистонга хеч бир алокаси бўлмаган «Индонезиялик Толибонлар Ислом конунларини зўрлаб киритишга уринмокдалар» номли макола чоп этилган. Газетанинг чет эллар хизмати ходими Ражив Чандрасекараннинг каламига оид бу макола Индонезиянинг пойтахти Жакартага якин Тасикамалая шахридаги вокеалар асосида ёзилсада, бутун мамлакатдаги жараёнларни умумлаштиришга даъво килади. Унинг кискача мазмуни шундай («Харакат» Агентлигининг хабарларидан олинди, 5 май,2002 йил).

Ислом Индонезияга 700 йилча аввал Хиндистон ва Ўрта Шаркдан келди. Бу ерда исломнинг анча толерант (токатли) йўналиши бўлмиш сўфий окими жорий этилди. У боскинчилар тарафидан зўрлаб киритилмагани учун, исломга янги кирганлардан Буддаизм, Хинду ва бошка динларнинг одатларини ташлаш талаб килинмаган. Натижада ислом билан махаллий одатлар кўшилиб кетишган. Аммо 19 асрнинг охирларида, кўплаб индонезиялик мусулмонлар Ўрта Шаркка саёхат килиб, ортодокс мусулмонлар билан мулокатда бўла бошладилар, натижада исломнинг консерватив шакли хам вужудга келди. 1945 йили Индонезия Нидерландиядан мустакил бўлгач, либерал ва консерватив мусулмонлар орасида давлатга хукумронлик килиш учун кураш бошланди.

Консервативлар мамлакат Конституциясига мусулмонларнинг шариатга бўйсинишлари шартлиги хусусида модда киритишни талаб килдилар. Лекин Сукарно бошчилигидаги мусулмон миллатчилар хукумат тарафидан расман танилган 5 динга – Ислом, Католицизм, Протестантизм, Хиндуизм ва Буддизмга асосланган «Панкасила» идеологиясини хукмрон килдилар.

Сукарнонинг вориси Сухарто мусулмон гурухларга давлатнинг асосини бузувчилар, деб карагани сабабли уларга карши агрессиврок босим ўтказа бошлади. Юзлаб мусулмон лидерлар камокларга ташланди, мусулмон нашрлар такикланди. Исломий сиёсий партиялар хукуматга содик эканликлари хакида ваъда беришлари лозим бўлди.

Аммо Сухартонинг 32 йиллик диктатураси 1998 йили битгач, Индонезия демократияга ўтиш даврининг гирдобига кирди, исломга карши кўйилган чегаралар олиб ташланди. Ва хамма диний лидерлар шариатга кайтиш чакирикларини янгидан баралла айтишга тушдилар.

13 йил камокда ўтириб чиккан Ирфон Авваз шундай дейди: «Панкасила» мамлакатимиз учун фалокат бўлди. Биз дунёнинг энг катта мусулмон давлатимиз. Шариат асосида яшаш бизнинг хаккимиздир».

Хозир Афгонистоннинг Толибонлари билан хеч бир ташкилий алокаси бўлмаган, лекин уларники каби гояларни таргиб килятган махаллий Толибон Бригадалари хамма ерда куч билан ўз тартибларини ўрнатишга интилмокдалар. Улар Тасикамалая шахрининг мехмонхоналари ва дўконларига бостириб кириб, спиртли ичимликларни ерга окизмокдалар, ичкилик ичиладиган кадахларни парчаламокдалар. Парнографик видео кассеталар сотиши тахмин килинаётган магазинларни яксон килмокдалар. Толибон Бригадалари ва у каби кўзикориндек кўпаяётган ташкилотлар, бундан ташкари, аёлларнинг ўралиб юришларини, судлар ўгриларнинг кўлини кесишга хукм килишларини талаб этишмокда.

Хали шариатни давлат бўйича татбик килиш йўналишида бу исломчилар катта ютукларга эришишди, деб бўлмайди. Аммо бугун буни истаган лидерлар Индонезиянинг эндигина оёкка туриб келаётган демократисида катта рол ўйнамокдалар. Улар махаллий хокимиятларга катта эркинликлар берилганидан фойдаланиб, провинцияларда истаган режаларини бажармокдалар.

Тасикамалаяда Толибон ва у билан коалициядаги консерватив мусулмонлар махаллий хокимни анча ишлар килишга мажбур килдилар. Булар - жума номози вактида жоме масжид атрофидаги автотранспорт катновини тўхтатиб кўйишдан тортиб, кайси динга мансублигидан катъий назар, хамма юкори синф ўкувчиларига исломий таълим беришгача етиб боради. Хоким булардан ташкари аёлларни ўралиб юришга мажбур килди ва чўмилиш ховузларини эркак ва аёлларникига ажратди. Толибон эса рейдлар уюштириб, алкогол ичимликлар, порнография ва фохишабозликка карши курашмокда.

Баъзи мамлакатлардан фаркли ўларок, Индонезиядаги радикал исломий гурухлар, ташкаридан келаётган ёрдам асосида иш олиб боришмаяпти. Кашшокликнинг чукурлашиши, конунсизликнинг авж олиши, иктисоддаги инкироз - радикал исломга бирдан бир ечим йўли, деб ишонаётган одамларнинг сонини кескин оширмокда.

АКШнинг терроризмга карши кураши бу ерда кўпчилик тарафидан исломнинг ўзига карши кураш, деб саналмокда. «Американинг уруши бизни бирлаштимокда», дейди Жиход Лашкарлари ташкилотининг рахбари Жафар Умар Толиб.

Бундай гурухлар хали кучли эмас, лекин Индонезиянинг демократияси учун катта хавф. «Радикал гурухлар аъзоларининг сони кўп эмас, лекин уларнинг жамиятга таъсири жуда кучли», дейди Либерал Ислом Тизимининг директори Улил Абшар-Абдуллох. «Хукумат хозир экстремистларнинг кўлида гаровда», дейди бир Осиёлик дипломат ва давом этади: «Хеч ким уларнинг кўлидан тутишни истамайди».

Якинда Ислом Тадкикотлари Давлат Университети бир текшириш ўказди. Унинг натижалари шундай: 58 фоиз одам Индонезияни Ислом давлатиги айлантириш тарафдори; 60 фоиз одам хукумат шариатнинг баъзи моддаларини хаётга жорий килиши лозим, деб хисоблайди; айни замонда, 60 фоиздан кўпрок одам Толибон Бригадалари талаб килаётгандек, рўза тутмаган ёки 5 махал номоз ўкимаятганлар билан полиция шугулланиши кераклигига карши.

Президент Мегавати Сукарнопутри ва парламентнинг кўпчилиги мамлакт бўйлаб шариатнинг киритилишига карши, лекин хукумат баъзи провинцияларга шариатнинг баъзи моддаларини киритиш учун рухсат бериб бўлди. Лекин ўртада, шариат 220 миллионлик Индонезиянинг хамма муаммоларини ечиб берадиган кучга эгами, деган савол бор.

«Хозир мамлакат жуда мухим тестдан ўтмокда», дейди юкорида номи тилга олинган Улил Абшар-Абдуллох. Унга кўра бу тест либерал ислом галаба киладими ёки радикал, деган савога жавоб бериши керак.

Хозирча, шариат нормалари татбик этилишга бошлаган Тасикамалаяда вазият шундай: Аёллар ўралиб юришади, ресторанларда ичкилик таклиф килинмайди, улар кечалари бўм-бўш. Хамма бундан хурсанд эмас, аммо бир нарса дейишга кўркишади. Макола Рени исмли аёлнинг: «Бошимни ўраб юрмасам, бу Аллохни севмайман, деганим эмаску» сўзлари билан тамомланади.

Индонезиянинг бугуни хакидаги ушбу маколани ўкиган одам Индонезия ва Ўзбекистон орасидаги баъзи параллелликларни кўриши табиий.

Узок тарихни олайлик. Ўзбекистон ва бутун Марказий Осиёга ислом дини келгандан кейин баъзи махаллий урф-одатлар, хатто аввалги динларнинг баъзи элементлари ислом билан бирга яшашни давом эттирган. Масалан, наврўзни байрам килиш канчалик кенг ёйилганини хамма билади. Ёки, якин 30-40 йилларгача аввалги динлардан колган оловга сигинишнинг баъзи шакллари хаётимизда етарлича ўрин олган бўлиб, у исломий рухдаги суннат ва никох тўйларида суннат килинадиган болани ёки уйланаётган йигитни гулхан атрофида айлантириш одати шаклида амалга ошириларди.

Якин тарихга, яъни Ўзбекистоннинг мустакиллиги учун кураш бошланган йилларга ўтайлик. Кайта куриш йилларида Ислом Уйгониш Партияси шаклланишга бошлади. Бу партия зўравонликка асосланмаган йўллар билан совет замонида каттик таъкиб остида бўлган исломни давлатдаги, жумладан, давлатни бошкаришдаги макомини тиклаш ниятида тузилганди. Давлатни бошкаришга даъво килиш - совет замонида феълан панжаралар ичида тутилган исломни кайтадан сиёсатлаштиришга интилиш эди.

Замонавий демократик тушунчаларга кўра, давлат дунёвий бўлиши, у диндан ажралиши керак. Демак, дин давлатни бошкариш жараёнига аралашмаслиги керак.

Аммо, мавжуд вокелик масалага кенгрок, либералрок, токатлирок карашни талаб килади. Бир томондан, вокелик шундан иборатки, мусулмон дунёсида сиёсий исломнинг илдизлари чукур. Иккинчи томондан, тажриба кўрсатмокдаки, сиёсий исломнинг йўлини тўсишнинг бирдан бир йўли уни яна кафасга солиш. Бу эса демократияга терс. Демак, демократия куриш учун дин эркинлиги бўлиши керак, сиёсий исломдан чўчисак, демократиядан воз кечишимиз керак. Хуллас, боши берк кўча.

Энди дунёнинг тажрибасига карайлик. Сиёсий исломни кафасда тутаман деб не холларга тушган Эрон шохини, Миср ва Ливия каби диктаторликларни кўйиб туриб, нисбатан демократик Туркия ва Покистонни олайлик. Улардаги демократиянинг «нисбий демократия» эканлигини сабаби - сиёсий ислом кўркуви эди. «Нисбий демократия» шароитида етарлича ривожланолмаган бу давлатлар кафасларни очган эдилар, Туркияда исломчиларнинг партияси хокимиятга келган бўлса, Покистонда исломчилар кучли, аммо, расмий мухолифат холига келишди.

Сайловлар йўли билан, яъни демократик принциплар асосида мувафаккиятга эришган бу исломчилар кимлар? Мўътадил, либерал, бошкаларга токатли исломчилар. Хатто Эронда хам 1980 йилда инкилоб йўли билан хокимиятга келган ўтарадикал исломчилар кун сайин либераллашмокда эканликларини унунтмаслик лозим.

Бу жараёнлардан фундаментал хулоса чикариш мумкин: Бу кунда мусулмонлар хам радикал сиёсий ислом билан либерал сиёсий исломнинг фаркига бормокдалар ва, бундан хам мухими, либералларга овоз бермокдалар.

Шу ерда Индонезия билан Ўзбекистон ўртасидаги параллелликларга кайтамиз.

Агар 1968 йилда Индонезия, 1990-чи йилнинг бошларида Ўзбекистон рахбарлари исломнинг сиёсийлашишига йўл берсалар эди, бу икки мамлакатда хам либерал исломий ташкилотлар шаклланган ва умумдемократик жараёнлар анча аввалга кетган бўлар эди.

Ўзбекистон Ислом Уйгониш Партияси оёкка турмасиданок катагонга учради, унинг рахбари Абдулла Ўтаев Ўзбекистон КГБси томонидан йўк килинди. Агар ўша йиллари реал кўппартиялик шаклланганда эди, бу партияда хам либерал канотнинг кучайишига кафолат берувчи икки омилни тилга олиш керак.

Биринчиси, Ўзбекистон Ислом Уйгониш Партиясининг ташкилотчилари ичида бўлмаса хам уларнинг оркасида таникли диний уламо, маърифатли ва замонавий инсон - Содикжон Камоловнинг туриши.

Иккинчиси, бу партия тузиш ташаббусчиларининг «Бирлик» рахбарлари билан якин алокалари.

Балки, айнан шу икки омил бу партияни бошлангичиданок эзиб ташланиши учун хизмат килгандир. Ислом Каримов бу партия «Бирликка» якинлигидан кўрккан бўлса, ўша пайтдаги Ўрта Осиё ва Козогистон мусулмонлари ташкилотининг раиси, Ўзбекистон рахбариятига якинлиги билан маълум бўлган Мухаммадсодик Мухаммадюсуф ўзининг ракиби Содикжон Корининг нуфузи баландлашиб кетишидан чўчиб, бу масалада президент Каримов билан тил бириктирган бўлиши мумкин.

Сухартонинг Индонезияда, Каримовнинг Ўзбекистонда олиб борган сиёсати сиёсий исломнинг йўлини тўсолдими? Йўк. Либерал исломчиларни катагон килиш одамларда нафакат демократияга бўлган ишончни, балки, умуман мўътадил, либерал, токатли бўлиш гоясига бўлган ишончни бутунлай бўлмаса хам маълум муддатга етарлича заифлаштирди, халос.

Ўзбекистонда демократлар хам катагонга учрадилар. Аммо, улар (бир катор «Эрк»чиларни хисобга олмаса) ўз гояларида мустахкам туриб, радикаллик тарафига силжимадилар. Айни нарса исломчиларда хам бўлди, деяолмаймиз.

Натижада, хар кандай экстремизмга, керак бўлса куролли курашга тайёр бўлган Ўзбекистон Исломий Харакати ўртага чикди.

Бу орада бутун кучини мухолифат (хам дунёвий хам исломий) билан курашишга сарфлаган Ўзбекистон режими системалик иктисодий ўзгаришлар хам килолмади. Халкнинг асосий кисми кашшокликка махкум бўлди. Бундай ахволда Исломий Харакатга нажот излаб борувчиларнинг, биринчи имконият тугилиши билан бу ташкилотга кўшилувчиларнинг ёки унга ёрдам берувчиларнинг сони кескин ошганини гапириб ўтирмаса хам бўлади.

Ўзбекистон хукумати мамлакат чегараларини ёппасига миналаштириб, ўзини кўриклашга тайёргарчилик кўрабошлади. Аммо, Боткент, Сурхандарё вокеалари аник кўрсатдики, оддий мусулмонларнинг каттагина кисми Ўзбекистон Исломий Харакатига ёрдам беришга тайёр. Вокеалар шу йўналишда давом этса, кенг микёсли фукаролар урушига етиб боришимиз мукаррар эди.

2001 йил 11 сентябрнинг фожеали вокеалари Ўзбекистоннинг хам такдирига хизмат килди. АКШ бошчилигидаги антитеррористик коалиция куролли кучларининг Афгонистонга кириши ва Толиблар режимининг агдарилиши, Ўзбекистон Исломий Харакатига хам хал килувчи зарба бўлди. Бу Харакат кайта оёкка туролишига энди факат мўъжизага ишонадиган ёки ишонишни истаганлар ишониши мумкин.

Бундан кейин бошланган ва энди давом этиши мукаррор бўлган жараёнлар Ўзбекистонда демократиянинг ривожланишига хизмат килишига шубха йўк.

Шу ердан бошлаб яна Индонезия билан киёслашни давом эттириш мумкин.

1998 йили Сухартонинг диктатураси тугаб, Индонезияда демократия олга кетабошлагани каби, 2001 йилда бошланган вокеаларнинг натижаси Ўзбекистонда демократиянинг галабаси билан тугаши керак. Аммо, энди демократиянинг йўлидаги бошка катта тўсик - Каримов режими кўйиб кетган «бомба»ларнинг портлашларидан пайдо бўлса керак. Булар кандай «бомбалар»?

Якин орада Ўзбекистоннинг концлагерь ва камокхоналаридан юзлаб, минглаб диний эътикоди туфайли озодликдан махрум этилган инсонлар чикишади. Иншоллох, чикишсин. Тахмин килиш кийин эмас, уларнинг каттагина бир кисми, ўз такдирини яна бир марта гаровга кўймаслик учун бирон бир сиёсий ёки диний-сиёсий ташкилотга кирмайди. Аммо, бу унчалик мухим эмас.

Мухим бўлгани, Индонезияда каби, узок вакт камокда ётгани, мудхиш кийнокларга дучор бўлгани, яна хам мухимроги, айнан диний ишончи юзидан азоб чеккани сабабли одамларнинг хурматига сазовор бўладиган, одамларни ўз оркасидан олиб кетоладиган ўнлаб сиёсий ислом лидерлари шаклланади. Уларниг хаммаси хам, камалмасдан аввалги дунё карашини, яъни мўътадилликка асосланган дунё карашини саклаб коладими?

Йўк, аксинча, улар энди кўпрок экстремизмга, фанатизмга, фундаментализмга мойил бўлишларининг эхтимоллиги катта. Улар демократик принциплар доирасида хам, худди Индонезида бўлаётгани каби, шариат нормаларини хаётга тадбик килишга интилишдан ташкари, демократияга зид, зўравонликка асосланган усуллар билан ўзлари тўгри деб билган нормаларни жамиятга зўрлаб киртишдан хам кайтишмайди.

Хўш, нима килиш керак? Демократияни саклаб колиш учун демократиянинг ўзини курбон килиб, дин эркинлигини йўк килиш керакми? Индонезияда кеча, бизда бугун килинаётгани каби.

Йўк.

Бир кун хам кечиктирмасдан мўътадил, либерал, замонга мос фикрлайдиган исломчиларга йўл бериш керак. Туркияда каби.

Айни замонда, мўътадил ислом - хукуматнинг ногарасига ўйнайдиган сохта ислом уламоларидан иборат эмаслигини хам унутмаслик шарт.