26 December 2009
02:27 - Тимошенконинг принципсизлиги Юшченкога ҳам юқибди
Украинада зарғалдоқчилар ичида бошланган ифлос кураш, бу собиқ коалиция раҳбарларнини мутлақо принципсиз қадамлар қилишга мажбур қилмоқда. Янги йил бошида бўладиган президент сайлови олдидан бу принципсизлик тўғридан-тўғри ўз ғояларига хиёнат қилиш шаклида намоён бўлмоқда.

Ҳамма нарса Юлия Тимошенконинг зарғалдоқ инқилоби ғояларига хиёнат қилиб, очиқдан-очиқ Россия бош вазири Владимир Путин билан ҳамкорлик қилишга, аниқроғи, унинг ноғарасига уйнаш йўлига ўтгандан кейин бошланди. Россиянинг хўжайини табиий газ масаласида Тимошенкога ён босиб, газ нархининг кескин ошиб кетишидан қўрқаётган украиналиклар олдида унинг рейтингини орттириб берди. Тимошенконинг президент бўлиб сайланиш шанси юксалди.

Энди маълум бўлишича, бундай шароитда Юшченко ҳам ўз принципларини ўзгартиришга бошлаган. Президент котибиятинингг ходими Ярослав Казачок бугун Украина матбуотида Юшченко ва Янукевич ўртасида имзоланган махфий Келишувнинг фотонусхасини эълон қилди ва ўз вазифасидан намойишкорона кетди. Келишувга кўра, бу икки сиёсатчи сайловолди компанияси давомида бир бирларини танқид қилишмайди, иккинчи тур сайлови бўлса, Юшченко Янукевични қўллаб-қувватлайди. Табиий, иккинчи турга Тимошенко ва Янукевич чиқадиган ҳол назарда тутилмоқда.

Бундай шароитда ким президент бўлишидан қатъий назар, Украинада сайловлардан кейин ҳам сиёсий барқарорлик бўлмайди, сиёсий барқарорликсиз, иқтисодда ижобий ўзгаришлар кутиш қийин бўлади. Демак, Украинанинг Россиянинг олдида эгилишдан бошқа йўли қолмаслиги мумкин.
« Олдинги хабар Хабарлар рўйхати Кейинги хабар »