25 December 2009
03:47 - Демократия шамоллари коммунистлар лагерига ҳам келди - Россия Компартияси парчаланди
Рус оммавий ахборот воситаларининг билдиришича, Санкт-Петербург Қонунчилик Мажлисининг депутати Владимир Федоров сўл қанотда янги сиёсий ташкилот – «Аврора» жамоат ҳаракати тузилганини эълон қилди. Унинг ўзи Ташкилий Бюронинг раиси этиб сайланди.

Бу ташкилот коммунистик идеологияни қабул қилган, аммо ҳозирги Россия Федерацияси Коммунистик Партиясига (КПРФ) кирмаётганларни ўзида тўпламоқчи. «Коммунист бўлиш, лекин компартияга аъзо бўлмаслик, айни замонда, компартияда аъзо бўлатуриб, коммунист бўлмаслик мумкин», дея КПРФга тош отибди Владимир Федоров. Ташкилий Бюронинг аъзоси Семен Борзенко эса шундай дейди: «Санкт-Петебургда КПРФни 300 мингга яқин одам қўллаб-қувватлайди, аммо фаоллар сони 3-4 мингдан ошмайди. Ҳамма ҳам партияга аъзо бўлишдек маъсулиятни елкасига олишни истайвермайди. Биз айнан шундайларни «юмшоқ формада» фаолиятга тортиш ниятидамиз».

Эслатиб ўтиш лозим, КПРФнинг Санкт-Петербург ташкилотининг собиқ раиси Владимир Федоров ва унинг сафдоши Семен Борзенко партия ичидаги кураш натижасида ўтган йили партиядан ўчирилган эдилар. Уларнинг айтишича, ҳозирнинг ўзидаёқ, «Аврора»нинг 200 минг аъзоси бор.
« Олдинги хабар Хабарлар рўйхати Кейинги хабар »