12 December 2009
03:47 - Туркияда курдларнинг партияси бекитилди
Бугун Туркиянинг Конституцион Суди 9 соатлик маҳкама жараёни сўнгида бир овоздан курдларнинг Демократик Жамият Партиясини (ДЖП) бекитиш қарори олди. Бу ҳақда хабар тарқатган расмий Анадўлу Агентлигининг билдиришича, партияни бекитиш сабаби сифатида “бу партия ўз ҳаракатлари, террор ташкилотига боғликлиги ва турли баёнотлари билан мамлакатнинг бутунлигига таҳдид солувчи кучларнинг фокусига айлангани” кўрсатилади. Шу қарор билан ДЖПнинг 37 фаолига 5 йил сиёсат билан шуғулланиш тақиқланди, бу партиядан сайланган икки парламент аъзосининг депутатлик мандати бекор қилинди.

Бу партияни бекитиш учун Конституцион Судда 2007 йил 17 ноябрда иш очилган экан.

Демократик Жамият Партиясинининг мамлакат парламенти – Туркия Буюк Миллат Мажлисида 21 депутати бор эди. 2 кишининг мандати бекор қилингач, қолган 19 киши мустақил депутат бўлиб парламентда қолаверади.

Бу каби воқеаларнинг тажрибасидан келиб чиқиб айтиш мумкинки, курдлар тезда янги ном остида бошқа партия тузадилар ва 19 депутат унга киради. Аммо, бундай партия ҳозирча парламентда расмий фракция тузолмайди, бунинг учун 20 депутат лозим. Шу кунгача парламентда 11 мустақил депутат бор экан. Агарда улардан биронтаси янги партияга кирса, у ҳолда янги партия парламент фракцияси ҳам тузиб олади. Яъни, Конституцион Судда партиянинг бекитилиши жиддий ўзгаришларга йўл очмайди. Лекин бу қарор курд сиёсатчиларига жиддий огоҳлантириш бўлиб қолса керак.
« Олдинги хабар Хабарлар рўйхати Кейинги хабар »